АҚШ президенти Барак Обама АҚШнинг Мериленд штатида олти кўрфаз давлатларининг етакчилари билан учрашди. Араб давлатларининг раҳбарлари учрашувда ўзлари кутган нарсага эришгандек бўлди. Чунки Кемп Дэвид резденциясида бўлиб ўтган учрашувда АҚШ ҳукумати Кўрфаз давлатларини ташқи хавф хатарлардан ҳимоя қилиш кафиллигини ўз зиммасига олганлиги ҳақида баёнотлар янгради. Баёнотда айтилишича, АҚШ Кўрфаз давлатларидан иборат иттифоқдошларидан асло воз кечмайди.
Кўрфаз минтақасида АҚШнинг кучли ҳарбий базаси мавжудлигини тилга олган Президент Обама агар араб иттифоқдошларини ташқи ҳужумлардан ҳимоя қилиш учун ҳарбий куч ишлатишга тўғри келса Пентагон бунга тайёрлигини билдирди.
Президент Обама кўрфаз давлатлари АҚШнинг минтақадаги энг яқин иттифоқдоши эканлигини ва Саудия қироли Салмон бин Абдулазизни жуда ҳурмат қилишини таъкидлар экан, араб давлатларини ташқи ҳужумлардан ҳимоя қилиш АҚШ ҳукуматининг зиммасида эканлигини айтиб ўтди.
“Бу давлатлар ташқи хатар билан юзлашган тақдирда Қўшма Штатлар ёрдамга келади. Минтақадаги муаммоларга ечим топишда ҳамкорликни янада кучайтирамиз”, “Кўрфаз давлатларининг хавфсизлиги доим муҳофаза қилиниши лозим. Ўзаро битимда кўрсатилганидек, бу ўлкаларнинг ҳудудий барқарорлигига таҳдид солувчи ҳар қандай хатарга қарши АҚШ улар билан ҳамкорлик қилишга доим тайёрдир”, деди Обама.
АҚШ президенти Форс кўрфазидаги иттифоқдошлари билан кўпроқ ҳарбий машқлар ўтказишга ваъда берди. Ваъдага кўра, ракетага қарши тизимни ташкил этишда, ҳаво ҳужумларига нисбатан олдиндан огоҳлантириш системасини вужудга келтиришда ҳамда махсус кучлар ва чегарачиларни тайёрлашда АҚШ Форс кўрфазидаги иттифоқчиларига ёрдам беради.
Кўрфаз ҳамкорлик кенгаши бош котибининг ёрдамчиси Абдулазиз Увайшиқ ҳам Кўрфаз давлатлари АҚШ учун муҳим эканлигига урғу берди.
“Кўрфаз ҳамкорлик кенгаши Қўшма штатлар манфаати учун ҳаётий масаладир”, деди у журналистларга берган интервьюсида.