АҚШнинг Европадаги қуролли кучлари қўмондони Бен Ходжес НАТОга аъзо давлатларни Россия таҳдидига қарши бирлашишга чақирди.
“Бу таҳмин эмас, Россиядан таҳдид мавжуд”, – деди Хожес, Россия элчисининг, агар Дания ракеталарга қарши мудофаа дастурларидан бирортасида иштирок этадиган бўлса ядро ҳужуми нишонига айланиши мумкинлиги ҳақида берган баёнотини эслатиб.
Шу билан бирга у ҳарбий тўқнашувлар бўлиши муқаррар, деб ҳисобламаслигини маълум қилди.
“Самарали дипломатик ечимлар билан таъминлаш учун тайёр туриш керак. Бунинг энг яхши кафолати – НАТОга аъзо давлатлар бирлиги”,- деб қўшимча қилди Ходжес.
Аввалроқ, АҚШ ва НАТОнинг Европадаги қуролли кучларининг собиқ қўмондони Уесли Кларк, Владимир Путин учун кенг миқёсли уруш бошлаш мутлақо мантиқсиз бўлишини, у Украина устидан назорат ўрнатмоқчи эканлиги тўғрисида баёнот берган эди. Шунингдек унинг сўзларига кўра, дунё урушга тайёр.
Туркистон:
Россия президенти Владимир Путин Украинага нисбатан олиб бораётган фитнакашлик урушларини яширишдан ожиз қолганидан сўнг кескин баёнотлар беришни бошлаган эди. Ўтган йилнинг куз ойларида Европа кенгашининг раиси Жосе Мануел Бароссо билан телефон орқали суҳбатлашган Путин “Агар хоҳласам Киевни икки ҳафтада оламан”, – дея ошкора таҳдид қилган эди.
Ўз президенти таҳдидидан руҳланган Россия элчиси Михаил Ванин жорий йилнинг 21 март куни агар Дания Америка томониданилгари сурилаётган ракета ҳужумига қарши мудофаа дастурларидан бирортасида иштирок этадиган бўлса Россия ядро ракеталари учун нишонга айланиши билан таҳдид қилган эди.
Россия президенти ва унинг элчиси томонидан билдирилган бундай баёнотлар Ғарбга нисбатан ошкора таҳдид бўлса, АҚШ учун эса ўзи томонидан тузилган халқаро системанинг қулаб кетиши мумкинлигидан хавотир пайдо қилади.
