Жорий ой бошида Президент Башар Асаднинг яқин иттифоқчиси бўлмиш Россия ташаббуси билан Сурия режими ва баъзи мухолиф гуруҳлар ўртасида учрашув бошланган эди. Худди аввалгилари каби бу музокаралар ҳам яна мувоффақиятсиз якунланди.
Женевада ташкил қилинган конференциялардан бирор натижа чиқмаган бўлса ҳам Россия Сурия режими ва мухолифат вакилларини келиштиришга тинмай ҳаракат қилмоқда. Москва Сурия режими ва мухолифатига мезбонлик қилиб уларни келиштиришга бир неча бор жонбозлик кўрсатди. Россия ташқи ишлар вазири Сергей Лавровга кўра, бу учрашувларда Женева хатоси такрорланмайди.
“Женевада қўйилган хатоларни такрорламаймиз. Учрашувларга барча мухолиф гуруҳларни таклиф қиламиз. Аввалги учрашувларимизда фақат Сурия миллий коалицияси таклиф қилинган эди”, деган эди Россия ташқи ишлар вазири аввалги учрашувлардан бирида.
Аммо бу галги музокараларда Дамашқдан давлат расмийлари қатнашган бўлса-да, бироқ Ғарб томонидан дастакланиб келаётган Сурия миллий коалицияси иштирок этмади. Уларнинг талабига кўра музокаларда Асаднинг мансабда қолиши ҳақида гап-сўз бўлмаслиги керак. Россия эса ҳар икки тараф, яъни Асад режими ва барча мўътадил мухолиф гуруҳлар ўртадаги низони ортга улоқтириб Исломий гуруҳларга қарши курашни қучайтирмоқлари лозимлигини уқтириб келади. Акс ҳолда кеч бўлиши мумкин.
Россия Ташқи ишлар вазири Сергей Лавровнинг фикрича, Сурияда биринчи бўлиб ҳал қилинадига масала – ўзининг тили билан айтганда – террорчи гуруҳларни бартараф қилишдир. Унга кўра, Сурияда Исломий гуруҳлар фаол кураш олиб борар экан, Асад режимининг амалда қолиши ёки ўзгариши ҳеч қандай аҳамият касб этмайди.
