28 февралга ўтар кечаси Кремль яқинида таниқли мухолифатчи-сиёсатчи, 55 ёшли Борис Немцов ўлдириб кетилди. Номаълум шахслар унга етти маротаба ўқ узган ва жабрланувчи воқеа жойида оламдан ўтган.
Немцов “РПР-ПАРНАС” сиёсий партияси ҳамраиси, Россия мухолифати мувофиқлаштирувчи кенгаши аъзоси эди. У сиёсий фаолиятини Нижегород вилояти губернаторлигидан бошлаган, Ёнилғи ва энергетика вазири ҳамда Бош вазирнинг биринчи ўринбосари сифатида ишлаган, Давлат думаси депутати бўлган.
Борис Немцов Россиянинг ҳозирги президенти Владимир Путиннинг ашаддий танқидчиларидан бири эди. Путин Немцовнинг ўлдирилишини буюртма ва иғвогарона қотиллик, деб атади.
Ғарб давлатлари етакчилари Борис Немцовнинг ўлдирилишини қоралаб, Россияни шаффоф тергов ўтказиш ва қотилларни жазолашга чақирди.
Россия Тергов қўмитаси бу жиноят олдиндан режалаштирилганига ҳеч қандай шубҳа йўқлигини таъкидлади. Қўмитанинг фикрича, Немцовнинг ўлдирилишидан мақсад Россиядаги сиёсий вазиятни издан чиқаришдир.
