Маълумки, 2015 йилнинг 1 март куни Тожикистонда парламент ва маҳаллий кенгашларга сайловлар бўлиб ўтади. Бу сайловлар бўлиб ўтиши олдидан Тожикистонга АҚШ давлат котибининг икки ёрдамчиси – Марказий Осиё масалалари бўйича ёрдамчисининг ўринбосари Даниэл Роземблюм ва демократия, инсон ҳуқуқлари ва халқаро диний эркинлик масалалари бўйича ёрдамчи ўринбосари Стивен Фелдштейн расмий сафар билан ташриф буюришди.
Давлат котибининг икки ёрдамчиси 5-8 феврал кунлари Тожикистонда бўладилар ва ташриф давомида улар Тожикистон ҳукумати аъзолари билан учрашиб, икки томонлама ва халқаро масалаларни, шу жумладан, Афғонистондаги вазиятни муҳокама қилиб оладилар ҳамда фуқаролик жамияти вакиллари билан учрашувлар ўтказишади.
Туркистон:
Аввал эришилган Тожикистон ва Россия ўртасидаги келишувига кўра, мамлакатда жойлашган рус ҳарбий базаси яна 40 йилга қолдирилган ва Россия Тожикистон армиясини қайта жиҳозлаш ва мамлакатни Евроосиё иқтисодий иттифоқига аъзо бўлишига тайёргарлик кўриш жараёнида ёрдам беришни ваъда қилган эди.
АҚШ давлат котибининг икки ёрдамчиси бир вақтда Тожикистонга ташриф буюриши ва уларнинг бу ташрифлари айнан бўлиб ўтиши режалаштирилган парламент сайловлари олдидан амалга оширилиши Америка ҳукуматига Тожикистоннинг Россия билан яқинлашишга бўлган ҳаракатлари ёқмаётганидан дарак бериб турипти.
Мамлакатда ҳукм сураётган иқтисодий муаммолар ва қашшоқлик март ойида бўлиб ўтадиган парламент сайловлари вақтида Тожикистондаги вазиятни издан чиқариш ва Россияга тобе бўлган Имомали Раҳмондан қутулиш учун қулай фурсатни пайдо қилиши мумкин.
Шу сабабли ҳам АҚШ давлат котибининг икки ёрдамчиси – улардан бири диний эркинликлар бўйича ёрдамчи ўринбосари – ташриф буюриши ҳам Марказий Осиё республикалари ичида ягона расмий партия – Тожикистон Ислом уйғониш партиясини қўллаб-қувватлаш орқали мамлакатда беқарорликни вужудга келтириш ва бу орқали нафақт Афғонистонда, балки Марказий Осиёда қолиши ва Россия босими остида минтақадан сиқиб чиқарилаётган ўз нуфузини қайта тиклашга ҳаракат қилиб кўриши эҳтимолдан йироқ эмас.
