Бу йил Тошкентдаги Ислом университетига киришни истан йигит қизларга имтиҳон учун кутилмаган саволлар тақдим қилинди. Саволлар шундай тарзда тузилганки, олинган жавоблардан абитуриентларнинг эътиқодий жиҳатларини ва жамиятдаги инсонлар билан алоқаларини билиб олиш учун йўл очилади.
Абитуриентларга кўра, имтиҳон саволлари уларни ноқулай аҳволга солиб қўйган. Чунки улар тўғри жавобни айтадиган бўлса, ўқишга киришдан умидини узишларига ва кейинги “допрос”га қатнашларига тўғри келади. Агар сиёсатга мойил қилиб жавоб берса ақидасига путур етади.
Масалан, саволлардан бири “Бугунги кундаги аёл ва қизларимизга ҳижоб керакми?”, деган саволдир. Агар бу саволга “йўқ, керак эмас”, деб жавоб берса, Қуронга зид гапирган ва Аллоҳнинг фарзларидан бирини инкор қилган бўлади. Бу эса ушбу абитуриентнинг кофир бўлишига сабаб бўлади. Агар “албатта хижоб керак”, деса, биринчидан сиёсатга қарши чиққан бўлади. Ундан кейин эса “Сен буни қаердан биласан? Сенга кимлар ўргатган? Шундай дейдиган яна кимларни биласан?”, деган саволларга жавоб бериш керак бўлади.
Шунингдек, ўқишга киришни истаган талабалар “Исломий оқимлардан қайсиларини биласиз?”, деган саволга ҳам жавоб беришлари керак. Бу савол ҳам абитуриентларнинг бошини қотирган. Чунки “йўқ, бирортасини билмайман”, деб жавоб берса, бу умуман ақлга тўғри келмайди. Ўзбекистон ҳукумати ҳозирги абитуриентлар туғулганидан буён диний оқимлар ҳақида дод солиб келади. Бу саволга қандай “билмайман”, деб жавоб бериш мумкин. Агар бирортасини биламан деб жавоб берса, боши балога қолди деяверинг. Ундан сўнг “Қаердан биласан? Қачондан бери биласан? Кимларни танийсан?”, ва ҳоказо.
Айтилишича, бу саволларга дунёсини ҳам, охиратини ҳам куйдирмайдиган жавоблар топиш мумкин экан. Бунинг учун абитуриентлар ушбу университет экспертлари тарафидан ёзилган китобларга мурожаат қилишлари лозим.
