Афғонистонда афғон аскарининг формасини кийган бир киши тарафидан уюштирилган ҳужумда америкалик генерал-майор Гарольд Грин ўлдирилди. Бу қўмондон Американинг юқори мартабали қўмондонларидан бири эди. Генерал-майор Гарольд Грин Америка армияси охирги 40 йилда йўқотган яъни Ветнам урушидан (1973 йилдан) буён ўлдирилган энг олий мартабали қўмондондир. Бундай олий мартабали қўмондоннинг ўлдирилиши АҚШ учун изоҳлаб бўлмайдиган ва қабул қилиб бўлмайдиган бир ҳолатдир.
Ҳужумда АҚШлик генерал билан бир қаторда германиялик бригада генерали ва бир нечта АҚШ ҳарбийси ҳам ҳалок бўлди. 20та ҳарбий жароҳат олди. Улардан бештаси Англия солдатларидир.
Афғонистонда Америкалик генералнинг ўлдирилиши Толибоннинг Афғонистондаги нуфузининг қандай даражага кутарилганлигини кўрсатмоқда. Ахборот воситалари орқали тарқатилган бу ҳужум Афғонистондаги бир қанча вазиятнинг ўзгаришига сабаб бўлиши айтилмоқда.
Таҳлилчиларга кўра, Толибон ҳаракати бундай ҳужумлар билан барча хорижий кучларга, хусусан АҚШ ҳарбийларига Афғонистоннинг ҳеч бир ерида хавфсиз бўла олмаслиги ҳақида хабар бермоқда. Толибон аввал берган ўзининг баёнотларида Афғонистон хавфсизлик кучлари орасида ўзларининг юзлаган жосуслари борлигини билдирган эди. Шунингдек, Толибон ҳаракатининг даъво қилишича, Афғон армияси сафида хизмат қилаётган бир қанча ҳарбийлар давлат армиясидан ажралиб Толибон сафига қўшилиш истагида юришипти, бироқ улар бунинг учун қулай фурсат кутишмоқда.
Афғон аскари ёки полицияси кийимини кийган кишилар тарафидан амалга оширилган ҳужумлар тоборо ортиб бораётгани кузатилмоқда. Охирги бир йил ичида бу каби ҳужумлар 13 марта амалга оширилди. Ҳужумларда ўлганларнинг аксарияти НАТОга хизмат қилаётган хорижий аскарлардир. Шунга кўра, Афғонистонда ҳарбий хизматини давом эттираётган хорижий аскарлар учун шарт шароитлар яна оғирлашиши кутилмоқда. Улар ўзларининг яқинларида турган ҳар бир афғон аскаридан шубҳаланадиган бўлиб қолган. Бундан аввал ҳам худди шундай бир неча ҳолат юзага келган эди. Бу эса бир қанча хорижий аскарларда руҳий муаммолар келиб чиқишига сабаб бўлмоқда.
Афғонистондаги хорижий аскарлар ўзларининг ҳарбий базаларидан ташқарига чиқишни исташмайди. Аммо бу охирги ҳужумлар уларнинг ҳарбий базаларининг ички қисми ҳам хавфсиз эмаслигини кўрсатди.
Айни пайтда афғонистонда 50 мингга яқин НАТО ҳарбийлари мавжуддир. 2010 йилда бу рақам 130 минг атрофида эди. Келгуси йилда Афғонистонда 10 минг НАТО аскари қолиши режалаштирилган.
