Қирғизистон бош вазирининг ўринбосари Абдураҳмон Маматалиев 6 июл куни Жалолобод вилоятининг Сузоқ туманига уюштирган иш сафари давомида қирғиз-ўзбек чегарасини бориб кўрди, унга вилоятнинг куч тизимлари раҳбарлари ҳамроҳлик қилишди.
Сузоқ тумани Ўзбекистон билан 60 километрлик чегарага эга бўлиб, шундан 2 километри баҳсли ҳисобланади. Ўзбекистон ва Қирғизистонни ажратиб туради. 1986 йилги харитага биноан айрим жойларда чегара дарёнинг Қирғизистон томонидаги қирғоғи бўйлаб ўтади.
Туман аҳолиси аввалроқ Қорадарё қирғоқларини мустаҳкамлаш ва унда тўғон қуриш ишлари ўтказилаётганида Ўзбекистон давлатлараро чегарани Қирғизистон ичкарисига қараб 300 метрга сураётганидан шикоят қилган, шунингдек, Қорадарё ўзани ўзгаргани юзасидан тушунтириш берилишини сўраган.
Бош вазир ўринбосари маҳаллий аҳоли билан учрашув чоғида Ўзбекистон томони чегарани Қирғизистон ичкарисига сураётгани ҳақидаги маълумотни рад этди ва Фавқулодда вазиятлар вазирлигига дарё қирғоғини мустаҳкамлаш ишларини олиб бориш бўйича топшириқ берганини маълум қилди. Бундан ташқари, Абдураҳмон Маматалиев маҳаллий ўз-ўзини бошқариш органлари раҳбарларини долзарб масалалар бўйича аҳоли орасида тушунтириш ишлари олиб бормаётгани учун танқид қилди.
Туркистон:
Чегаралар муаммолари, шу минтақадаги давлатларнинг ўзаро муаммолари эмас. Балки халқаро сиёсатни бошқариб келаётган катта давлатлар томонидан атайин илгари суриб келинаётган муаммолардан биридир. Бу Қирғизистон ёки Ўзбекистон ҳукуматлари томонидан ўз манфаатларини илгари суриб атайин уюштириб келинаётган иш ҳам эмас. Негаки уларнинг барчаси шу чегаралардаги ҳар қандай муаммолардан фақат зиён кўриб келишади. Давлатлараро келишмовчиликлар ортидан ўрталаридаги чегара тўсиқларини кучайтириш ёки умуман беркитиб олиш билан якун топади. Бу эса ҳар икки томон халқи учун ижтимоий, иқтисодий муаммолар келтириб чиқариш билан бир қаторда, этник миллатларга қарши миллатчилик ҳаракатлари келиб чиқишига ҳам асос бўлади.
