Кейинги пайтларда “Ироқ ва Шом Ислом давлати” жамоаси Ироқда фаоллашиб бораётгани кузатилмоқда. Улар Мосул ва Тикрит ва бундан бошқа бир нечта шаҳарларни қўлга киритиб, Пойтахт Бағдод сари илдам ҳаракат қилишаётгани хабарларда тарқалди. Шаҳарни қўлга киритган мужоҳидлар турмалардаги маҳбусларни озодликка чиқариб юборишган. Найнаво бўлкасининг губернатори Атил Нужайфи халққа қурол тарқатиб мужоҳидларга қарши жанг қилишга буюрганига қарамай, ҳукумат кучлари ва полициячилар постларини ва иш жойларини ташлаб қочишга мажбур бўлишган.
“New York Times” ахборот агентлиги тарқатган хабарга кўра, воқеанинг бундай тус олишидан хавотирга тушган Ироқ бош вазири ал-Маликий махфий суратда Обама идорасига мурожаат қилиб, мужоҳидларнинг қўлига ўтган ерларга осмондан зарба беришни сўраган.
Бу ҳодисага ўз муносабатини билдирган АҚШ президенти Барак Обама Ироққа аскар юбормаслигини, аммо халқаро хавфсизлик кучлари тайёрлаётган бошқа бир қанча вариантлар борлигини билдирди.
“Ироқ шаҳарларини қўлга киритган террористлар охир-оқибат Қўшма штатларнинг миллий хавфсизлиги учун таҳдидга айланиши мумкин. Мен вариантлар тайёр туришини талаб қилдим”. “Ироққа харбий аскарларимизни юбормаймиз. Ироқ халқи ўз қарорини ўзи бериши лозим”, деди Барак Обама.
Айни пайтда шияларнинг олий диний раҳбари Оятуллоҳ Али Систоний Карбалода қилган жума хутбасида халқни қўлига қурол олиб сунний мужоҳидларга қарши жанг қилишга даъват қилган.
Сўнги хабарларга кўра, Ироқ ҳарбий кучлари Салоҳиддин вилоятининг маркази Тикрит шаҳри ва Бекка районига ҳаводан ҳужум уюштирган. Ҳужум оқибатида 40 киши ҳалок бўлгани ва 30 киши жароҳат олгани айтилмоқда.
