29 май куни Остона шаҳрида бўлиб ўтган Евроосиё иқтисодий иттифоқи Олий кенгашининг йиғилишида Россия, Белорус ва Қозоғистон президентлари Евроосиё иқтисодий иттифоқини ташкил этиш ҳақидаги ҳужжатни имзолашди. Ҳужжат жорий йил охирига қадар Россия, Белорус ва Қозоғистон парламентлари томонидан тасдиқланиши режалашрилмоқда. Мазкур келишув 2015 йилнинг 1 январидан кучга киради.
Йиғилишнинг якуний ҳисоботида қайд этилишича, ташкил этилаётган мазкур ташкилот аъзо давлатлар учун иқтисодини мустахкамлаш, “бир-бирлари билан яқинлашиш”, замонавийлашиш ва жаҳон бозорида рақобатбардошлик сифатини кучайтириш имкониятини пайдо қилади. Сафи янги аъзолар билан тўладиган ва Евроосиё иттифоқига айланадиган Божхона иттифоқи 170 миллион аҳолига эга дунёдаги йирик интеграция тузилмаларидан бири ҳисобланади. Аъзо мамлакатларнинг умумий Ялпи ички махсулоти (ЯИМ) 2,7 миллиард долларга тенг. Божхона иттифоқи Европа иттифоқи ва Хитойдан кейин, дунёдаги йирик учинчи бозор ҳисобланади. Божхона иттифоқи етакчилари иттифоқ ҳудудини Арманистон ва Қирғизистон ҳисобига кенгайтиришни режалаштирмоқдалар.
Қозоғистон президенти Нурсултон Назарбоев таклифига биноан Қирғизистон президенти Алмазбек Атамбаев ҳам мазкур йиғилишда иштирок этди.
Йиғилишда сўзга чиққан Алмазбек Атамбаев, “Россия ва Қирғизистон махсус жамғарма ташкил этиш ниятидамиз, бу жамғарма Қирғизистон республикасини Божхона иттифоқи ва Евроосиё иқтисодий иттифоқига қўшилиши давомида молиявий кўмак беради”, – деди.
Атамбаевнинг сўзларига кўра, қирғиз томони жамғармани энг юқори даражада қўллаб-қувватлаш ва ётқизиладиган сармоялар хавфсизлигини таъминлаш кафолатини беради.
“Қирғизистонни Божхона иттифоқига аъзо бўлиши бу – зарурият, бу ташкилот бизнинг мамлакатимиз ривожланиши учун қўшимча туртки берадиган ва англаб қабул қилинган қарор ҳисобланади”, – деди президент.
Қирғизистон президенти Алмазбек Атамбаев билан бўлган иккитомонлама учрашувда Россия президенти Владимир Путин, Россия Қирғизистонни Евроосиё иқтисодий иттифоқига аъзо бўлиши мобайнида ёрдам беришга ва елкама-елка туришга тайёр эканлигини маълум қилди.
Ўз навбатида Алмазбек Атамбаев, агар оғир дақиқаларда Россия кўмак кўрсатмаганида, кўп нарсалар қийинроқ кечган бўлиши мумкинлигини таъкидлаб ўтди. “Шунинг учун ҳам биз белгиланган режаларни амалга ошириш мобайнида пайдо бўладиган муаммоларни хал этишда кўмак кўрсатадиган ва амалда ёрдам берадиган ёнимизда дўстимиз борлигини англаган ҳолда ишонч билан бу қарор қабул қиламиз”, – дея белгилаб ўтди Атамбаев.
Шунингдек йиғилишда фахрий мехмон сифатида Арманистон президенти Серж Саркисян ҳам иштирок этди.
