Эрон диний раҳбари Оятуллоҳ ал-Ҳоманаий АҚШ президенти Барак Обамага ўз эҳтиромини изҳор этиб махфий мактуб йўллаганлиги ошкор бўлди. Инглиз тилида АҚШда чиқадиган « The Wall Street Journal» кунлик газетасининг эронлик дипломатга таяниб ёзишича, ўтган ҳафтада Ҳоманаий Барак Обамага Эрон ядро лойиҳаси мазокараларига алоқадор махфий мактуб юборган. Дипломатнинг билдиришича, Ҳоманаийнинг махфий мактуби Обама тарафидан келган махфий мактубга жавоб тарзида ёзилган.
АҚШ президенти Барак Обама 2014 йилнинг октябр ойида Ҳоманайига мактуб йўллаганлиги хабар қилинган эди. Мактубда агар ядро музокаралари ишончли босқичга ўтса АҚШ ИШИДга қарши қарши курашда Эрон билан ҳамкорлик қилиш мумкинлиги ҳақида айтилган эди.
Ҳар икки давлат мамсъуллари бу махфий ёзишма ҳақидаги хабарни тасдиқламаган бўлса-да бироқ бу ҳақида бирор баёнот ҳам беришмади.
Ўтган ҳафта Эрон ташқи ишлар вазирининг ёрдамчиси Абдуллиҳён террорчи (Исломий) гуруҳларга қарши курашда АҚШга ишонмаслигини билдирган эди.
“АҚШ Эрондан террорчи (Исломий) гуруҳларга қарши кураш учун ёрдам сўради. Аммо биз АҚШнинг тўғри сўзлигига ишонмаймиз. Чунки бу гуруҳлардан баъзиларига АҚШнинг ўзи ёрдам бериб келмоқда”, деди Абдуллиҳён.
Шундай бўлишига қарамай, Абдуллиҳён махфий мактублар ҳақида бирор калима ҳам гапирмади. Оқ уй сўзчиси Жош Эрнест эса махфий мактубга оид берилган саволга “Мен Обаманинг махфий мактублари ҳақида баҳс юритадиган ҳолатда эмасман”, дея жавоб қилди ва Эронга нисбатан позицияси ўзгармаганлигини билдирди.
Ҳоманаий шу ҳафта берган баёнотида ядровий дастур бўйича келишимга эришиш тарафдори эканлигини билдирди.
Эрон ядровий дастури устида БМТ хавфсизлик кенгашининг доимий беш аъзоси АҚШ, Британия, Франция, Россия ва Хитой ҳамда 5+1 ҳисобида Германия бир йилдан кўпроқ вақтдан буён музокаралар олиб бормоқда. Тарафлар ҳануз бир ечимга келиша олгани йўқ. Музокаралар давом этяпти. 30 июнь музокаралар учун охирги муддат қилиб белгиланган. Ғард давлатларининг масъуллари келаётган март ойида бир натижага эришишни кўзлаётганлигини айтишмоқда. Эрон атом қуроллари устида ишламаётганини исботлай олса, Ғарб унга иқтисодий тарафдан ёрдам кўрсатиши мумкинлигини айтиб келади.
