Араб давлатлари лигасининг делегацияси Дамашққа келди
Араб давлатлари лигаси ўз делегациясини Башар Асад режимини қонунийлаштириш учун Дамашққа юборди. Бу ҳақида “Сурия Президентлиги”нинг расмий Телеграм каналида тарқатилган баёнотда маълум қилинди. Баёнотда айтилишича, мазкур делегация таркибидаги тўққизта араб давлатидан келган депутатлар Асад режими бошчилигидаги Сурияни Араб давлатлари лигасига қайта қўшиш масаласини муҳокама қилиш учун Дамашққа ташриф буюрган.
Маълумки, БМТнинг АҚШ томонидан қўллаб-қувватланган 2254 сонли қарори асосида Асадга қонуний тус берилган бўлиб, у шу қарорга биноан расмий етакчи сифатида тан олинади. БМТнинг ушбу қарорига мувофиқ ҳаракат қилаётганини ифода этган Туркия ҳукумати ҳам, Асад билан муносабатларини қонуний дея таъкидлай бошлади.
Изоҳ: 22 давлатни ўз ичига олган Араб давлатлари лигаси Англия тарафидан вужудга келтирилгани барчага маълум. Бу лига Халифалик давлати қулатилгандан кейин мусулмонларнинг қайта бирлашиб кетишини олдини олиш ҳамда Муқаддас тупроққа ўрнаштириб қўйилган яҳудий вужудини мустаҳкамлаш ва уни араб давлатлари ўртасида кучли қилиб кўрсатиш учун таъсис этилган муассасадир. У бугунги кунда ўзининг ҳар-бир ҳаракат ва фаолиятини АҚШ қандай чизиб берган бўлса, худди шундай мукаммал тарзда ижро этмоқда. Унга аъзо давлатларни жамлаб турган нарса лига эмас, балки малайликдир.
Эслатиб ўтиш лозимки, 2011 йил ўз ҳақ-ҳуқуқини талаб қилиб чиққан тинч аҳолини қирғин қилган Асад режими Араб давлатлари лигасидан четлаштирилган эди. Ҳатто Қоҳирада бўлиб ўтган йиғилишда мазкур Лига Сурияда қўлланган кимёвий ҳужум масъулиятини тўлиқ Асад режимига юклаб, уни халқаро маҳкамага топширишни талаб қилган эди.
Бугунга келиб нима ўзгарди-ки, Араб давлатлари уни қайта лигага қўшиш учун ҳаракатга келиб қолди? Ваҳолангки, Асад режими ҳамон ўз халқини қирғин қилишда давом этмоқда. Ҳатто Сурия халқи зилзиладан жабр кўриб турган пайтда ҳам Асад режими айнан ўша жабрдийдаларни ҳужумга тутди. Бу ҳақида Сурия инсон ҳақлари обсерваторияси маълум қилди.
Мана шундан маълум бўлиб турибдики, Араб давлатлари лигасининг бирдан-бир вазифаси мустамлакачи давлат томонидан режалаштирилган лойиҳани қойилмақом қилиб бажаришдир. Бу лиганинг уставига кўра, ҳар қандай Исломий ўлкаларнинг мустақиллиги тан олиниши шарт. Улар орасида бирлик бўлиши амалий жиҳатдан тақиқланади. Уставга кўра ҳар бир давлат ҳар қандай узоқда жойлашган давлат билан – гарчи у давлат лиганинг бирор аъзосига душман бўлса ҳам – кучли алоқалар ўрнатиш ҳуқуқига эга. Бу эса, Исломий ўлкаларни яна-да парчалаб ташлаш, мусулмонларнинг бирлигига зарба бериш ва уларни мустамлакачи кофирларга қарамлигини кучайтиришдан бошқа нарса эмас.
Шунга кўра, Араб давлатлари лигаси ва шунга ўхшаш мусулмонларни парчалаш ва Исломий ўлкаларда мусулмонларнинг нуфузини кучайтиришга хизмат қиладиган муассасалар Исломий шариат нуқтаи назаридан қаралганда ботилдир. Уларни ҳаётдан супуриб ташлайдиган ва элликдан ортиқ давлатчаларга бўлиб ташланган Ислом ўлкаларини битта байроқ остида бирлаштирадиган Халифалик давлатини тиклаш учун ҳаракат қилиш ҳар бир мусулмоннинг вазифасидир.
Зоҳид Заргар
