Новиков: “ИШИД” Марказий Осиёда “Халифалик” давлатини тикламоқчи
Мустақил давлатлар ҳамдўстлигининг терроризмга қарши кураш маркази раҳбари генерал Андрей Новиков “ИШИД” жангчилари Марказий Осиё мамлакатларида “Халифалик давлатини” тиклаш режасини тузаётганлигидан огоҳлантирди. Генерал Новиков бу ҳақида терроризмга қарши кураш бўйича “Антитеррор-2018” тадбирлари доирасида ўтказилган Мустақил Давлатлар Ҳамдўстлиги мамлакатларидаги хавфсизлик ва разведка хизмати раҳбарларининг йиғилишида маълум қилди. Унинг сўзларига кўра, “ИШИД” жангчилари бу ҳудуддаги “ҳужайралар”ини фаоллаштириш пайига тушган.
Ўз навбатида Қирғизистон бош вазирининг ўринбосари З. Раззоқов террористик таҳдидлар, Марказий Осиё ва Мустақил Давлатлар Ҳамдўстлиги мамлакатларида узоқ муддатли можароларни келтириб чиқариши ҳақида огоҳлантирди. Унга кўра, минтақадаги вазиятни беқарорлаштириш учун “террорчилар”нинг шимолий Афғонистондан бу ҳудудларга суқулиб киришга ҳаракат қилаётгани алоҳида ташвиш уйғотмоқда.
Июн ойида Россия Федерал хавфсизлик хизмати директорининг ўринбосари ҳамда терроризмга қарши кураш миллий қўмитасининг раиси Игор Сироткин “ИШИД” ташкилоти шунча йўқотишларга қарамасдан, бутун дунё бўйлаб тарқалиб бораётганлигини ва жиддий таҳдидларга сабаб бўлаётганлигини билдирган эди.
Стратегик режа тузиш институтининг директори Александр Гусевнинг сўзларига кўра, “Исломий давлат хужайралари” Яқин Шарқ ва Марказий Осиёнинг деярли барча тарафларига ёйилиб бормоқда.
Туркистон:
Россия Марказий Осиё учун Афғонистон орқали океанга транзит йўли очилишидан хавотирда. Океан Марказий Осиёни жаҳон бозорига олиб чиқади. Унда Марказий Осиё Россиянинг иқтисодий мустамлакасидан чиқиб кетиши мумкин. Газ, нефт қувирлари қурилиши билан “Газпром”, “Ростнефт” каби Россия компаниялари Ўрта Осиёдан сиқиб чиқарилади.
Россия ўз манфаатларини ҳимоя қилиш учун Марказий Осиёда, хусусан, Қирғизистон ва Тожикистонда қалбаки ваҳималар пайдо қилиш орқали ҳарбий иштирокини кучайтириб олмоқчи. Шунингдек, ҳарбий ҳолатни вужудга келтириб, Афғонистон орқали ҳар қандай иқтисодий манфаатли лойиҳаларни ортга сурмоқчи. Марказий Осиё давлатларининг раҳбарлари Афғонистон орқали ўтадиган транзит йўли минтақа учун қанчалик манфаатли эканини англаб туришган бўлсалар ҳам, Россиянинг фитналаридан чўчиб, унинг найрангларига бош эгишга мажбур бўлишади. Акс ҳолда Россия минтақада қалбаки террорчилар номидан қўпорув амалиётларини амалга ошириб вазиятни издан чиқариб юбориши мумкин!
