Абдусалом Азизов: Биз душманни қайтаришга тайёрмиз
Ўзбекистон ва Тожикистон ҳарбий кучларининг ўқув-машғулотлари биз душманни қайтаришга тайёр эканлигимизни кўрсатди, деди Ўзбекистон мудофаа вазири генерал-майёр Абдусалом Азизов Тожикистоннинг Соррухдарон полигонида бўлиб ўтган ўзбек-тожик ҳарбий ўқув машғулотлари сўнггида. Бу ҳақида “Sputnik” хабар қилди.
Вазир айтишига қараганда 5 кун давом этган ўқув-машғулотлари икки дўстона армия тарихида илк бор ўтказилган манёврлар бўлиб, у тарихий аҳамиятга эга.
“Бугунги кунда дунё ва Марказий Осиё ҳудудидаги вазият, халқаро террорчи гуруҳлар фаоллигининг ортиши – бизни ҳушёр бўлишга, қуролли кучларимизни доимо жанговар шай ҳолатда туришга мажбур қилади. Биз ягона ҳудудда яшаймиз, шунинг учун фақатгина биргаликда қилинган дўстона ҳаракатлар ва ҳарбий қисмларнинг ўзаро ҳамкорлиги натижасида, биз терроризмга қарши чиқишимиз ва уни енгишимиз мумкин”, – деди Абдусалом Азизов.
Тожикистон мудофаа вазири ўз навбатида бугунги кунда Афғонистон шимолидаги вазият алоҳида хавотир уйғотаётганини хабар қилди.
“У ерда террорчилар гуруҳларининг фаоллиги ҳамда “ИШИД” жангариларининг тўпланиши кузатилмоқда. Миллий хавфсизликка қарши пайдо бўлаётган чақириқлар ва террорчилик мисли кўрилмаган даражада фаолллашган шароитида, ҳеч бир мамлакат уларга бир ўзи қаршилик кўрсата олмайди. Бундай вақтда ҳудуддаги кучларни бирлаштириш муҳим аҳамиятга эга. Тожкистон ва Ўзбекистон республикалари Марказий Осиёга кириш истеҳкомлари ҳисобланади. Давлатларимиз раҳбарлари Афғонистонда тинчлик ва барқарорлик ўрнатиш учун қўлларидан келган барча ишларни қилмоқда. Шу билан бир вақтда биз террорчиликнинг барча йўналишларига қарши курашни кучайтирмоқдамиз”, – деди Шерали Мирзо.
Эслатиб ўтамиз, Ўзбекистон ва Тожикистон ҳарбиларининг қўшма ўқув машғулотлари 17 сентябр куни Тожикистондаги “Нурафшон” ўқув марказида бошланган эди. 600 га яқин ҳарбийлар иштирок этган ўқув машғулотлари 22 сентябрга қадар давом этди.
