Жубайр: АҚШ истаса биз Сурияга қўшин юборишга тайёрмиз
АҚШда чиқадиган “Wall Street Journal” газетаси АҚШ президенти Доналд Трамп маъмурияти томонидан таёрланган “Сурия лойиҳаси”ни эълон қилди. Лойиҳага кўра, Суриядаги АҚШ қўшинларининг ўрнига араб қўшинлари жойлаштирилади. Шунингдек газетанинг ёзишича, Оқ уй маъмурияти Саудия арабистони, Бирлашган Араб Амирликлари ва Қатардан Сурияга қўшин юборишдан ташқари миллиардлаган доллар маблағ ҳам талаб қилган.
Айни пайтда Саудия Арабистони ташқи ишлар вазири Адил Жубайр АҚШ бошчилигидаги коалиция кучларини кенгайтириш борасида қарор қабул қилинса, Саудия қироллиги Сурияга аскар юборишга тайёр эканлигини билдирди. Жубайрга кўра, Саудия ҳозирги вақтда Вашингтон билан Шарқий Сурияда мавжуд бўлиши керак кучлар ҳақида муҳокама олиб бормоқда.
“АҚШ билан учрашувлар ўтказяпмиз. Сурия инқирози бошлангандан буён у ерга аскар юборишга таёрлигимизни билдириб келамиз”, деди Саудия Арабистони ташқи ишлар вазири.
Адил Жубайрнинг таъкидлашича, Саудия ҳукумати аввал бошдан терроризмга (Исломга) қарши кураш учун Исломий иттифоқ таркибидан Сурияга қўшин юбориш масаласини Вашингтонга таклиф қилган. Бироқ, Обама маъмурияти Саудиянинг бу таклифини қабул қилмаган.
“Биз АҚШ билан ўтказган мунозараларимизда Сурияга қўшин юбориш масаласига нисбатан, (АҚШнинг собиқ президенти) Барак Обамага таклифимизни билдирган эдик. Агар Қўшма Штатлар Сурияга қўшин юборадиган бўлса, бошқа давлатлар билан биргаликда колиция қўшинларининг бир қисми сифатида Саудия Арабистони ҳам “Сурияга қўшин юбориш” масаласини ўйлаб кўриши ҳақида Обамага айтган эдик” деди Жубайр БМТнинг бош котиби Антонио Гутеррес билан Саудия пойтахти Ар-Риёдда ташкил қилинган қўшма матбуот анжуманида.
Сурияга қўшин юбориш ғояси янги эмаслигига ишора қилган Саудия ташқи ишлар вазирининг таъкидлашича, Саудия Арабистони терроризмга қарши кураш учун Вашингтонга ўз таклифларини тақдим қилишидан олдин ҳам, кейин ҳам, Исломий иттифоқ таркибидаги давлатларга Сурияга қўшин киритиш борасидаги фикрини билдириб келган. Лекин Обама маъмурияти бу таклифлар хусусида тегишли чоралар кўрмаган.
