Суғурта компанияларининг даромадлари яна ортди
2025 йилнинг 1 чорак натижаларига кўра, Қирғизистондаги суғурта компанияларининг даромадлари 2024 йилнинг январ-март ойларига нисбатан 2,4 баробарга ошган. Бу ҳақда Миллий статистика қўмитаси маълум қилди. Унга кўра, мамлакатда фаолият кўрсатаётган 17та суғурта компаниясининг 1 чоракдаги даромади 2 миллиард 97 миллион сомга етган. Ушбу даромадлар бахтсиз ҳодисалар ва касалликлар суғуртаси ҳамда кўчмас мулк ва автомобиллар суғуртаси ҳисобига ортган. Йил бошидан буён 9,9 минг суғурта ҳодисаси қайд этилган ва шу вақт ичида суғурта учун 274 миллион сом тўланган.
Статистик маълумотларга кўра, суғурта ҳолатлари йилдан-йилга ортган сари, суғурта компанияларининг даромадлари ҳам ортиб бормоқда. Бундай ҳолатнинг юзага келишига, тўғрироғи, одамларнинг Исломда ҳаром ҳисобланган суғурта фаолиятига жалб этилишига ҳукуматнинг сиёсати бевосита таъсир кўрсатмоқда. Чунки ҳукумат 2024 йилдан бошлаб кўчмас мулкни қайта рўйхатдан ўтказишда суғурта шартномасини мажбурий қилиб қўйди. Бундан ташқари, жорий йилнинг 1 июлидан бошлаб автомобил суғуртаси ҳам мажбурий бўлади. Бундан бош тортган фуқаролар жаримага тортилади. Шунингдек давлат мулозимлари кўчмас мулкини суғурта қилдирмаган фуқароларга ҳеч қандай товон пули тўланмаслигини айтиб келмоқда. Бундай мажбурлаш ва қўрқитиш сиёсати туфайли одамлар ўзларининг кўчар ва кўчмас мулкларини суғурта қилишга мажбур бўлишмоқда. Айни пайтда бу сиёсат суғурта тушунчасини халқ орасида кенг тарқалиб, уни оддий ҳолга айланишига хизмат қилмоқда.
Суғурта – бу капиталистлар учун одамларнинг чўнтагига ҳужум қилиш имконини берувчи “бизнес-режа”дир. Юқоридаги статистик маълумотлардан кўриниб турибдики, суғурта компанияларининг даромадлари 2 миллиард сомдан ошган бўлса-да, суғурта харажатларига атиги 274 миллион сом ажратилган. Капиталистлар бундай катта фойдани қўлга киритиш учун ҳукуматга суғуртани мажбурий қилиб қўядиган турли қонунларни қабул қилдириб, “ҳаводан” улкан фойдалар топмоқда. Шундай қилиб, суғурта тизими, бир томондан, капиталистларга одамларнинг мулкига ҳужум қилиш орқали бойиб кетишга имкон яратиб бераётган бўлса, иккинчи томондан, ҳукуматнинг офатлардан жабрланганларга ёрдам кўрсатиш масъулиятидан қочишига йўл очиб бермоқда.
Исломда ҳаром қилинган суғурта тизими судхўрлик каби капиталистик тузумнинг ажралмас қисмидир. У паразит каби бошқаларнинг ҳисобидан кун кўради. Шундай экан, капиталистик тузумни тарк этиб, исломий тузумни қабул қилмас эканмиз, халқнинг қонини сўрувчи бундай иллатлардан ҳеч қачон қутила олмаймиз.
Ҳорун Абдулҳак
