ИИВ экстремизм баҳонасида мусулмонларга нисбатан зулмни кучайтириш ниятида
Қирғизистон ички ишлар вазирлиги экстремистик материаллар сақлаганларни жавобгарликка тортишни таклиф қилди. Бу ҳақда ИИВ ахборот хизмати маълум қилди.
Таклиф этилаётган қонун лойиҳасига кўра, бундай материалларни сақлаган шахслар уч йилгача озодликдан маҳрум этилиши кўзда тутилган. Шунингдек, оммавий ахборот воситаларида эълон қилинган экстремистик материаллар учун ҳам жавобгарликка тортиш назарда тутилган.
ИИВнинг маълумотларига кўра, 2020 йилдан бошлаб 2024 йилнинг сентябрига қадар экстремистик жиноятлар бўйича 1823та жиноий иш қўзғатилган. ИИВ бундан аввал Қирғизистонда экстремизмни тарқатганлик учун жазони кучайтиришни таклиф қилувчи қонун лойиҳасини муҳокамага қўйган эди. Унда экстремизмда айбланаётган мусулмонларнинг жазо муддатини икки ёки уч йилгача ошириш назарда тутилган. Масалан, 3 йилга озодликдан маҳрум этилиши керак бўлганларни 5 йилга, 5 йилга озодликдан маҳрум этилиши керак бўлганларни эса 7 йилга озодликдан маҳрум қилиш билан жазолаш таклиф этилган.
Бундан ташқари, ҳукуматнинг “дунёвий” мухолифларига нисбатан ҳам “экстремизм” тамғаси босила бошланди. Зеро, ШХТ томонидан берилган экстремизм таърифи бунга имкон беради.
Изоҳ:
Аслида, Қирғизистонда аллақачон 21та диний ташкилотнинг фаолияти тақиқланиб, уларнинг аъзоларига нисбатан турли жазолар қўлланилган. Айни пайтда жазоларни кучайтириш ва “экстремизм”да айбланаётган шахсларнинг доирасини кенгайтириш ишлари олиб борилмоқда. Зеро, мамлакатда солиқ ва тўловларнинг кўпайиши аҳолининг ҳукуматга нисбатан норозилигини кучайтирмоқда. Бу ҳолат мухолифат учун қулай фурсат бўлиб, улар бундан ўз манфаатлари йўлида фойдаланишга ҳаракат қилди. Бироқ, амалдаги ҳукумат ҳибсга олиш орқали мухолифат етакчиларини “синдирдим”, деб ўйлаётгани боис навбатдаги курашни мусулмонларга қаратмоқда. Ҳақиқий мусулмонларнинг позицияси ва норозилигини бостириш учун уларни “экстремизм”да айблаб, ҳибсга олиш билан таҳдид қилмоқда. Ҳукумат бундай ҳаракатлардан ўз манфаатини кўзлаётган бўлса-да, аслида бу ерда оламий куфр тузуми Ислом ва унинг қадриятларига қарши курашмоқда. Бу борада махсус лойиҳалар ишлаб чиқилиб, маблағлар ажратилмоқда.
Маълумки, ҳозирда дунёга ҳукмронлик қилаётган империалистик капитализм тузуми емирилиб, қулаш арафасига келиб қолди. Уни қулатиб ўрнига вужудга келадиган тузум бу – Исломдир. Шунинг учун мустамлакачилар мусулмонларни соф Исломдан чалғитиш учун “анъанавий Ислом” ва “мўътадил Ислом” каби лойиҳаларни ишга солмоқда. Бунинг акси ўлароқ, соф Исломни маҳкам тутиб, уни кўтариб чиқувчиларни “экстремист”га айбламоқда. Мана шундан ҳам, экстремизм ва терроризм “эртаклари” кофирлар томонидан Ислом ва мусулмонларга қарши курашиш учун ўйлаб топилганлиги кўриниб турибди. Ҳатто, ҳозир уларнинг хатти-ҳаракатлари ўзлари берган тарифга мос келади.
Шубҳасизки, халқаро ва маҳаллий сиёсатдаги бундай иккиюзламачилик капитализмнинг ўлимини яқинлаштирмоқда. Чунки дунё ва минтақада содир бўлаётгани каби Қирғизистонда ҳам мафкуравий-сиёсий бўшлиқ чуқурлашиб бормоқда. Умид қиламизки, бу мафкуравий бўшлиқни Ислом мафкураси, сиёсий бўшлиқни эса сиёсий онгли мусулмонлар тўлдиради. Мустамлакачи кофирлар ва малайларининг найранглари тамоман пучга чиқади. Аллоҳ Таоло айтади:
وَيَمْكُرُونَ وَيَمْكُرُ اللَّهُ وَاللَّهُ خَيْرُ الْمَاكِرِينَ
– “Улар макр қилурлар, Аллоҳ ҳам «макр» қилур. Аллоҳ «маккор»роқдир”. [8:30]
