Садир Жапаров Путин билан учрашди
24 май куни Қирғизистон президенти Садир Жапаров Сочи шаҳрида Россия президенти Владимр Путин билан учрашди.
Давлат раҳбари матбуот хизматининг хабар беришича, у Россия президенти Владимир Путин билан музокаралар ўтказишни режалаштирган, унинг давомида икки томонлама ҳамкорликнинг долзарб масалалари, Қирғизистон ва Россия ўртасидаги ҳамкорликни янада кенгайтириш истиқболлари муҳокама қилинади.
“Минтақавий хавфсизликни таъминлаш, шу жумладан КХШТ, МДҲ ва ШҲТ доирасидаги ҳамкорлик, шунингдек, Евросиё иқтисодий интеграциясини чуқурлаштириш масалалари бўйича ўзаро муносабатларга алоҳида эътибор қаратилади”, – дейилади хабарда.
Бундан ташқари, томонлар коронавирус пандемиясига қарши чораларни, шу жумладан Қирғизистонга Россия вакциналарини етказиб беришни муҳокама қилишни режалаштирмоқдалар.
Изоҳ: Садир Жапаров ҳам президентликка сайлангач ўтмишдошлари каби биринчи расмий сафарини Москвадан бошлаган эди. Одатдагидек, бу сафардан фойда кўрган фақат Россия бўлди. Сафар ортидан Жеруй олтин кони Россияга “қўшқўллаб” топшириб юборилди. Аммо Жапаров сафар олдидан ваъда қилган газ нархини арзонлатиш ва бошқа муҳим масалалар ҳал бўлмай қолаверди. Ҳозирга қадар қирғиз халқи газнинг 1000 куб.метр учун 220 доллардан ҳақ тўлаб келмоқда. Ҳатто, ўтган йили пандемия сабабли жаҳон бозорида газ нархи тушиб кетганида ҳам Қирғизистонда газ арзонламади. “Газпром” ваъда қилган газлаштириш ишлари ҳам оддий халқ ҳисобидан олиб борилмоқда. Уйига газ туширмоқчи бўлган одам “газчиларга” трубасидан тортиб деворга қоқиладиган миқигача олиб бермоқда. Бундан ташқари, Жапаровнинг Путин билан учрашиб қайтганидан сўнг мактабларда ўқувчи қизларнинг рўмоли яна “кун тартибига” чиқди.
Бу сафарги учрашувда Путин Жапаровга қирғиз-тожик чегараси билан боғлиқ муаммоларни ҳал қилишда ёрдам бериш учун барча саъй-ҳаракатларни кўришини маълум қилди. Россия чегара масаласида қандай ёрдам берганига яқиндагина барчамиз гувоҳ бўлдик. Россия бошчилигидаги КХШТ, ШҲТ ёки ЕОИИ билан алоқаларни кучайтириш қуллик кишанини янада мустаҳкамлаш хизмат қилади холос. Шундай экан Жапаровнинг навбатдаги сафаридан ҳам халқимиз учун бирор манфаатли бўлган ўзгаришни кутиш ўринсиз.
Абдураҳмон Одилов
