Ўзбекистонда ўқувчи қизлар рўмолига қарши кураш кучайиб бормоқда
Ўзбекистонда кенг қулоч ёзган коррупция, монополия, барча сердаромад соҳалар фақат пулдор, амалдор ва таниш-билишлар ўртасида тақсимлаб олиниши натижасида мамлакатда ишсизлик муаммоси тобора кучайиб бормоқда. Нарх-наво кундан-кунга ошиб одамлар ҳатто асосий эҳтиёжларини таъминлашга ҳам қодир бўлмаяпти. Оддий фуқаролар тирикчилик илинжида чет элларга иш излаб кетишга мажбур бўлишмоқда. Ҳукумат эса коррупция ва бир ховуч монополистларга қарши курашиш, одамларнининг инсондек кун кечиришларига имкон берувчи иш ва иш ҳақи билан таъминлаш ўрнига ожиза қизларнинг рўмолларига қарши курашиш билан овора. Мирзиёев “ислоҳотлари” ортидан Россия билан тобора“илиқ”лашиб бораётган муносабатлар натижасида Ўзбекистонда мактаб ўқувчиларининг рўмоли яна кун тартибига чиқди…
8 апрел куни ижтимоий тармоқларда Наманган вилояти Янгиқўрғон туманидаги 10-сонли мактабда дарсларга рўмолда қатнаётган қизлар билан профилактик суҳбат ўтказилгани тўғрисидаги хабар тарқалди. Унда 10 нафар ўқувчи огоҳлантиришларга қарамасдан ҳижобда дарсга қатнагани сабабли ИИБ ходими “суҳбат ўказаётгани”, рўмол ўраган ўқувчи қизларнинг ИИБ ходими қаршисида тургани кўриш мумкин эди. Афсуски, бу ягона ҳолат эмас, жорий йил бошида ҳам Тошкентдаги 168-мактабда рўмолли қизлар мактабга киритилмаётгани тўғрисида хабарлар тарқалди. 6 апрел куни эса Ўзбекистон миллий университети журналистика факультети декани ўринбосари Равшан Омонов ҳам талабалар билан ўтказган мажлисида:
“Ўқишга ибодат либосида келиш тақиқланади, бундай кийинганларни дарсга киритган ўқитувчиларга ҳам чора кўрилади. Ташқарида қандай юриш ўзингизнинг ихтиёрингиз, лекин университет ҳудудига кирган вақтда рўмолни орқа тарафга ўраб олишга мажбурсизлар. Агар университетнинг бу тартиби, қонун-қоидаси сизларга тўғри келмаса, марҳамат қилиб университет билан шартномани бекор қилишингиз ва шунга рухсат берган бошқа ОТМга ўтишингиз мумкин”, – деган эди. Кейинчалик у ўз иши учун кечирим сўраб, “ўзининг шунчаки топшириқ ижрочиси эканини ва рўмолга қарши эмаслигини, буйруқни бажараётганини” ёзиб чиқди. Лекин бир қанча вақтдан сўнг постини ҳам, изоҳини ҳам ўчириб ташлади. 8 апрел куни Андижон вилояти Шаҳрихон туманидаги 28-сонли мактабда директор ўринбосари рўмолли қизларга танбеҳ бераётгани ҳақидаги видео тарқалди. Видеодан маълум бўлишича, мактаб маъмурияти 10-синф ўқув хонасига кириб текшириш ўтказган. Рўмолли қизларни доска ёнида турғизиб қўйиб танбеҳ берган. “Ҳали буни ўрашдан зерикасиз. Худойим умрингиз узоқ қилсин, ўраб зерикасиз. Ҳозир мактаб-ку, бу ернинг ўз қонун-қоидаси бор, ўз формаси бор. Шуни биласизларми? 11-синфми булар ҳам? 10-ми? 10-синф ўқувчиси шу даражада ўранасизларми-эй?” – дея қизларга танбеҳ берган мактаб директори ўринбосари.
Бу каби кўринишлар фақат Ўзбекистонда эмас, балки Россия билан “илиқ” муносабатларни кучайтириб бораётган Қирғизистонда ҳам кузатилмоқда. Сўнгги вақтларда Қирғизистон мактабларида ҳам ўқувчи қизларнинг рўмолига қарши кураш кучайиб бормоқда. Ҳатто, Жапаров ҳукумати ўтган йили пайғамбаримиз Муҳаммад соллаллоҳу алайҳи ва саллам шаънини ҳимоя қилиб ўтказилган тинч намойишда иштирок этган муслима опа-сингиларимизга қарши “экстремизм” моддаси билан жиноят иши очишгача бориб етди…
Демак, ўзбек режими ҳам, қирғиз режими ҳам Россияга ёқиш илинжида Ислом дини, унинг қадриятлари ва мусулмонларга қарши курашни кучайтириб бормоқда. Бундан хулоса қилиш мумкинки, ҳар икки режим куч органларида катта таъсир қувватига эга рус махсус хизматлари кураторлари халқ ичида ўсиб бораётган Ислом таъсири ва исломий кўринишларга қарши курашни мувофиқлаштириб турипти.
Абдураҳмон Одилов
