Қиморхоналар очиш тўғрисида яна бир қонун лойиҳаси таклиф қилинди
Қирғизистонда қонун лойиҳаси муаллифлари қимор ўйинлари учун маъмурий ихтисослашган район яратишни таклиф қилиб чиқишди. Улар бундай кўнгилочар мажмуалар ёпиқ жойларда ташкил этилиши ва фақат чет элликлар учун хизмат кўрсатиши ҳақида айтишмоқда. Ҳужжат ташаббускорлари Жўғорку Кенеш депутатлари Улуғбек Ўрмонов, Қалдарбек Баймуротов, Саидолимжон Жўрайев, Бейшенали Нурдинов ва Чаилообек Атазовлардир.
Бундан аввалроқ, Иссиқкўл вилоятида қимор ўйнашга рухсат берувчи қонун лойиҳаси икки депутат томонидан тақдим этилган эди. Мазкур лойиҳа 8 апрел куни бўлиб ўтган Жўғорку Кенеш ялпи мажлисида муҳокама қилиниб, овоз беришга юборилган эди.
Қирғизистонда қимор ўйинлари 2012 йилда, букмекер идоралари эса 2015 йилда тақиқланган. Шундай бўлсада, аксарият казинолар яширин тарзда ёки бошқа ном остида фаолият олиб бормоқда.
Бугунги кунда бизга татбиқ қилинаётган капиталистик тузум давлатга ва унинг фуқароларига хоҳлаган тарзда даромад топиш имкониятини беради. Жамиятда кўриб турганимиздек, судхўрлик, қимор ўйинлари ва фирибгарлик даромад топишнинг одатий манбаига айланган. Ҳукумат томонидан капитализм асосида чиқарилган қонунлар ушбу даромад манбаларининг деярли барчасига кенг йўл очиб берган, қолган-қутганлари учун ҳам “каридор”лар қолдирган ва ушбу “каридор”лар ҳокимият томонидан ҳимоя қилинади. Шу сабабли, букмекерлик ва лотерея ўйинлари, фирибгарлик, молиявий пирамидалар ва тармоқ маркетинги каби кўзбўямачиликлар дунёнинг деярли барча мамлакатларида кенг тарқалган. Бундай қимор ўйинларидан кўплаб одамлар азият чеккани ва қанчалар оилалар бузилиб, бошпанасиз қолган инсонларга гувоҳ бўлиб келяпмиз. Қонун лойиҳасини таклиф қилаётган депутатлар буни яхши билишади. Бироқ, улар бир ҳовуч “тадбиркор”ларнинг манфаатларини жамият манфаатларидан устун қўйишмоқда. Чунки казинолар коррупция ва иқтисодий жиноятчилар учун жуда катта аҳамиятга эга. У ерларда порахўр амалдорларнинг ҳаром йўл билан қўлга киритган пуллари ювилади. Кейин, улар порахўрлик ёки бошқа ноқонуний йўллар билан топган пулларини “қимордан ютиб олди” дея, ҳужжатлаштириб, ҳашаматли уйлар қуришга киришади. Бутун дунёдаги казиноларнинг асосий даромад манбаи шунга ўхшаш ифлос ишларни бажариб бериш билан ривожланиб бормоқда. Улар ҳар икки тараф билан келишган ҳолда, пора берувчидан пул ютиб олиб, пора олувчи томонга ўтказиб бериш орқали порахўрлик жараёнини хавфсиз қилиб беришади. Шунинг учун казино ҳукумат амалдорлари учун коррупсияни ривожлантиришда жуда муҳим тармоқлардан биридир.
Хулоса қилиб айтиш мумкинки, қимор ўйинлари жамиятга зарар етказиш билан бир қаторда Аллоҳ ҳаром қилган амаллардан биридир.
Аллоҳ Таоло Ўз Каломида шундай марҳамат қилади:
يَاأَيُّهَا الَّذِينَ آمَنُوا إِنَّمَا الْخَمْرُ وَالْمَيْسِرُ وَالْأَنصَابُ وَالْأَزْلَامُ رِجْسٌ مِنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُونَ
Эй мўминлар, ароқ (маст қиладиган ичкилик ичиш), қимор (ўйнаш), бутлар (яъни уларга сиғиниш) ва чўплар (яъни чўплар билан фолбинлик қилиш) шайтон амалидан бўлган ҳаром ишдир. Бас, нажот топишингиз учун уларнинг хар биридан узоқ бўлингиз! (5:90).
Мумтаз Маверанаҳрий
