Жээнбеков Европадан ёрдам бериш имкониятларини кўриб чиқишни илтимос қилди
2-апрелда президент Сооронбай Жээнбеков Европа Кенгаши раиси Шарл Мишел билан телефон орқали сўзлашиб, коронавирусга қарши курашиш чораларини муҳокама қилишди.
Жээнбеков Шарл Мишелдан коронавирус инфекцияси оқибатларини юмшатиш мақсадида Қирғизистонга қўшимча ёрдам кўрсатиш имкониятларини кўриб чиқишни илтимос қилди. Шарл Мишел Европа Кенгаши Қирғизистонга молиявий ёрдам кўрсатиш йўлларини кўриб чиқишини маълум қилди.
Жээнбеков коронавирус инфекцияси тарқалишини олдини олиш ва Қирғизистон иқтисодига етиши мумкин бўлган зиёнларини камайтириш бўйича кўрилаётган чорала ҳақида айтиб берди.
Изоҳ: Қирғизистон ҳукумати ўз иқтисодий имконияти ва кучини тўғри баҳолмай туриб мамлакатда фавқулотда ҳолат эълон қилди. Ҳукумат фавқулотда ҳолат эълон қилиш ортидан донор давлатлардан бериладиган грант ва қарзларни қўлга киритиш ва шу орқали бюджетдаги камомадни ёпишга умид қилган эди. Шу сабабли ҳам фавқулотда ҳолат эълон қилинганидан ҳеч қанча вақт ўтмай Халқаро валюта фондидан 121 миллион доллар қарзи олишга улгурди. 2-апрел куни президент Сооронбай Жээнбеков БМТ бош қотиби Антониу Гутерришга мурожаат йўллаб, коронавирус инфекциясига қарши кураш учун 2 миллиард долларлик инсонпарварлик ёрдам ишларини бошлаш учун оламий режа тузиш бўйича ташаббусини қўллаб-қувватлашини маълум қилди. Демак, қирғиз ҳукумати БМТнинг бу ёрдамига ҳам кўз тикиб турипти.
Шу каби қарз ва ёрдамлардан умид қилган ҳукумат одамларни кунлик тирикчилик манбалари бўлган ишхоналари, дўконлар, бозорларини беркитди. Кунлик тирикчилик қилиб турган барча хизмат кўрсатиш муассасалари, хатто, мардикорчиликларини хам куч билан таъқиқлаб қўйди. Эвазига тўлаши керак бўлган конпенсация хақида хеч қандай гап йўқ.
Ғарб давлатлари карантин туфайли одам бошига бир неча минглаб доллар товон пули тўлай бошлашди. Ҳатто, Россия президенти Путин ҳам 2-апрел куни халққа қилган иккинчи мурожаатида фуқаролар учун иш ҳақи сақлаб қолинган ҳолда 30-апрелга қадар дам олиш эълон қилди. Чунки давлат фуқароларининг асосий (кундалик) эхтиёжларини таъминлашдан масъул.
Қирғизистон ҳукумати эса баъзи сиёсий вазиятларини тўғрилаб олиш ва халқаро сиёсат ажратиши мумкин бўлган ёрдам пулларидан умид қилиб мамлакат ва халқни иқтисодий инқироз томон олиб бораябти. Одамларнинг яшаш даражаси пасайиб, жамият қашшоқлик тубига қулай бошлади. Карантин, товарлар етишмаслигидан эмас, энди товарларни харид қилиш учун маблағлар етишмаслиги муаммосини келтириб чиқаради. Бу ўз навбатида жиноятчилик, талончилик, хукуматга қарши норозилик харакатларни кучайтиради.
