Жанубий Корея бош вазири расмий ташриф билан Қирғизистонга келди
Жанубий Корея бош вазири Ли Нак Ён расмий ташриф билан 17 июл куни Қирғизистонга келди.
Ташриф доирасида 50дан зиёд Корея компаниялари иштирокида қирғиз-корес бизнес-форуми, икки томонлама учрашувлар ўтказиш режаланган. Хабарда айтилишича, томонлар савдо, қишлоқ хўжалиги, соғлиқни сақлаш, тоғ-кон тармоғи, туризм, энергетика, транспорт, тўқимачилик саноати ва ахборот технологиялари соҳасида ҳамкорлик масалаларини муҳокама қилишади.
Корея бош вазирини президент Сооронбай Жээнбеков қабул қилади. 2018-йил 13-август куни бўлиб ўтган Қирғизистон республикасини барқарор тараққий эттириш бўйича Миллий кенгаши мажлисига раислик қилган Жээнбеков, “…Биз Хитой билан ҳамкорликни стратегик даражага етказдик, шунингдек, Туркия, Япония, Жанубий Корея, АҚШ ва Евроиттифоқ мамлакатлари билан муносабатларни ривожлантиришга ҳаракат қиламиз”, – деб таъкидлаган эди.
Маълумки, “стратегик ҳамкор” номи остида Жанубий Корея АҚШга қарам. АҚШ Жанубий Кореяга энг кўп сармоя киритувчи давлат бўлиб, у ерда АҚШга қарашли йирик компаниялар фаолият олиб боради. Кореяни бошқа ривожланаётган давлатлар билан бўладиган алоқаси АҚШ билан бўлган алоқа жумласидан ҳисобланади. АҚШ Қирғизистондаги бугунги ҳолатдан фойдаланиб ўзининг иқтисодий таъсирини кучайтириб олишга интилиши табиий. АҚШ Жанубий Корея орқали нафақат Қирғизистонда, балки Марказий Осиёда ўзининг иқтисодий қувватини оширишга эътибор қаратмоқда. Жорий йил апрел ойида Жанубий Корея президенти Мун Чжэ Ин Марказий Осиёнинг учта мамлакати бўйлаб сафари доирасида 16-18 апрел кунлари Туркманистонга, 18-21 апрел кунлари Ўзбекистонга, 21-23 апрел кунлари Қозоғистонга ташриф буюрган эди.
Жанубий Корея президентининг ташрифидан кўзланган мақсад — Жанубий Кореянинг Марказий Осиё давлатлари билан яқин муносабатларини мустаҳкамлаш ва Мун Чжэ Иннинг “Янги шимолий сиёсат”и доирасида консенсусга эришишдан иборат эканлиги хабар қилинган эди.
Абдураҳмон Одилов
