Россия Қирғизистонга ваъда қилинган ҳарбий техникани берди
Россия Евросиё иқтисодий иттифоқи доирасида олган мажбуриятини бажариш мақсадида Қирғизистонга ваъда қилинган ҳарбий техниканинг бир қисмини етказиб берди. Бу ҳақда Россиянинг Қирғизистондаги элчихонаси маълум қилди.
Хабарда айтилишича, чегарани қўриқлаш ва назорат-ўтказиш пунктларини жиҳозлаш учун 123та ҳарбий автомобил ва инженерлик техникаси Бишкекка олиб келинган.
Мазкур техникани топшириш маросими Бишкекдаги Ала Тоо майдонида 15 январ куни ўтказилади. Унда президент Сооронбай Жээнбеков ва ҳукумат аъзолари қатнашади.
Россия ва Қирғизистон 2015 йилда ҳарбий-техник ёрдам тўғрисидаги шарномани имзолаган эди. Шартномага асосан Россия Евросиё иқтисодий иттифоқига қўшилган Қирғизистонга чегара-назорат пунктларини жиҳозлаш ва чегарани қўриқлашни кучайтириш учун ҳарбий-техник ёрдам кўрсатади.
Россия элчихонаси ёрдамнинг иккинчи қисми 2019 йилнинг охиригача Қирғизистонга етказиб берилишини билдирди.
