Роза Отунбаеванинг Текебаевни авф этиб, озод қилиш илтимосномаси президент тарафидан рад этилди
Отунбаева сиёсий элита лидерларини президентга қарши йўналтирадими?
22 декабр куни собиқ президент Роза Отунбаева бошчилигида қамоқдаги Омурбек Текебаевнинг 60 ёшга тўлгани муносабати билан, атайин юбилей маросими уюштирилди. Унда, деярли бутун Қирғиз элитасининг вакиллари, яна бир қатор партия ва фракция етакчилари иштирок этишди. Кейин элита лидерлари қамоқхонанинг махсус шифохонасида даволанаётган маҳбус Текебаев олдига боришиб, унга илиқ сўзлар айтишди ва яхши истаклар билдиришиб, уни туғилган куни билан ўз лидерларидек табриклашди. Президент Сооранбай Жээнбеков ҳам уни телефон орқали табриклагани маҳаллий матбуот орқали маълум қилинди.
25 декабр куни Отунбаева ўзининг номидан Текебаевни авф этиб, озод қилишини сўраб президентга мактуб йўллади. Мурожатномага 6 фракция етакчилари имзо чекиб, ўз розиликларини ифодалашди. Январ ойида эса махсус комиссия томонидан Отунбаеванинг мактубига рад жавоби берилди.
Президент Жээнбеков шу йилнинг Ноябр ойида сиёсий кескинликлар пайдо бўла бошлаганида Отунбаева орқали Қирғиз элита лидерларини сиёсий майдонда актив фаолият юритишга чақирган эди. Элита лидерлари эса, турмада ўтирган Текебаевни сиёсий жараёнларга аралаштиришни талаб қилишди. Улар Текебаевнинг ҳали ҳам Қирғиз элитасининг лидери эканини тан олиб, Отунбаева номидан президентга мактуб орқали мурожаат қилишган эди. Сиёсий вазият бир оз тинчиб қолгач, президент эски элита лидерларини етакчи гуруҳ ўрнига олиб келишдан бош торта бошлади.
“Биз кўтарган масала (яъни Текебаевни озод қилиш масаласи) ҳозирги сиёсий вазиятдан келиб чиқиб, сиёсий ечим сифатида қабул қилиниши керак эди” деди Отунбаева.
Демак, Отунбаева Текебаевни президентга маслаҳатчи сифатида таклиф қилган. У ва 6 фракция вакиллари мурожатномани имзолаганларига қараганда президент аввал бу таклифни қабул қилган. Текабаевнинг юбилей маросими бутун Қирғиз етакчи сиёсатчилари иштирокида нишонлангани ҳам бу гумонларни тасдиқловчи фактлардан биридир. Кейин президент ўз ваъдасидан бўйин товлаган бўлиши мумкин.
Президент ҳалигача ўзи учун ишончли команда (гуруҳ) танлай олмаяпти. Ҳозирги етакчи гуруҳ эса, уни эски президентдан ажратиб олди. Лекин ўзлари кучли сиёсий маҳорат эгаларидан ташкил топган эмас. Шунинг учун улар президентни юқоридаги каби барча етакчи гуруҳлар билан алоқаларини бузиб боряпти. Мамлакат боши берк кўчага кириб бораётганига қарамай, кучли сиёсатчиларнинг етакчиликка келишига тўсиқлар қўйишмоқда. Чунки, кучли сиёсатчиларни бошқаришга ожизлик қилишларини яхши билишади. Бу кетишда келгуси баҳор яна сиёсий кескинликларга бой бўлиши кутилмоқда. Чунки Қирғизистонда мамлакатни бошқарув тизгинини президентлик эмас, доимо етакчи гуруҳлар бир бири билан талашиб келишади.
Энди эски сиёсий доира вакиллари ҳам сиёсий жараёнларга актив кириша бошлаши кутилади. Улар шу кунгача ўзларига эътибор қаратилишини кутиб, ҳеч бўлмаганда маслаҳат кенгашлари етакчилигидан умид қилиб кутиб туришган эди. Яъни етакчи гуруҳ улардан мамлакатни бошқарувда тажриба алмашиб, маслаҳат қилиб бўлса ҳам ўзларига қўшиб олишидан умид қилишган эди. Лекин улар кутаётган муомила, оқибат, натижа кўринмади. Шунинг учун улар энди мухолифат томонга ўтиб кетиш билан қўрқитишяпти.
Муайян фикр (мафкура)га асосланмаган ҳокимиятнинг оқибати шундай бўлиши табиий. Унда барча сиёсий гуруҳлар шахсий манфаатини мамлакат манфаатидан устун қўйиб, бири иккинчиси билан келиша олмайди. Уларни бирлаштира оладиган мафкура мавжуд эмаслиги боис, манфаат ҳаммасини пароканда қилиб юбораверади. Давлат, мамлакат, халқ эса, уларнинг очкўзликлари қурбонига айланиб, бошқа мамлакат ва халқаро куфр системасига тоборо тобеъ бўлиб ва улардан қарздор бўлиб бораверади!
Абдураззоқ.
