Жээнбеков: Қирғизистон бутун дунёга шарманда бўлди
Қирғизистон президенти Сооронбай Жээнбеков 14 декабр куни бош вазир Мухаммедкалий Абилғозиевга транспорт ва автомобил ишлари вазири Жамшидбек Калиловни вазифасидан вақтинчалик четлатиш ҳақида топшириқ берди. Бу ҳақда у Қирғизистон Хавфсизлик кенгаши йиғилиши давомида айтиб ўтди, деб маълум қилмоқда “Tazabek” нашри.
Президент транспорт вазирининг ўринбосари яқинда пора билан ушлангани ҳақида тўхталиб, “Қирғизистон республикаси бутун дунёга шарманда бўлганини” таъкидлади.
“Калилов, ўрнингиздан туринг, агар сизнинг ўрнингизда бўлганимда, ҳеч бўлмаса тергов даврида ариза ёзиб, ишдан вақтинчалик кетган бўлардим. 500 минг долларни ҳамма муҳокама қилмоқда. Мен губернатор бўлганимда, ногиронлиги бўлган болаларнинг оналари фарзандлари ҳақида қайғуриб, ишлашга имкон топишмаган ва нафақа ҳақида сўрашарди. Яқинда бош вазир бу масалани ҳал қилди ва улар бундай кичик пулдан мамнун бўлиб ўтиришибди. 500 минг доллар эса – бу нимаси? Барчани жавобгарликка тортиш керак. Ҳурматли бош вазир, уни ишдан вақтинчалик четлатинг, у Хавфсизлик кенгашида ўтирибди, бу қандай шармандалик?!”, – дея дарғазаб бўлган Жээнбеков.
Туркистон:
Порахўрлик коррупциянинг маҳсулидир. Коррупция эса, бошқарув система асосланган Мабда (тузум)нинг маҳсули бўлиб, улар (яъни порахўрлик, иқтисодий инқирозлар, коррупция, ахлоқий бузуқлик…. ва ҳоказолар) демокротияга асосланган капиталистик мабданинг табиий инқирозидир!
Қирғизистон элитаси ҳам, коррупцияга қарши курашдан ҳеч қандай наф чиқмаслигини яхши тушунади. Шунинг учун улар коррупцияга қарши курашмайди. Фақат бир-бирлари билан ҳокимият талашаётиб “коррупцияга қарши кураш” амалиётидан фойдаланишади. Яқинда Бакиевчилар томонидан коррупцияда айибланганлар, ҳокимят алмашиб бир кунда тоза одамларга айланди. Атамбаевчилар ҳокимиятдан кетиши билан, энди улар коррупцияда айбланиб бир бошидан жиноий жазога тортилиб боришяпти.
Демак муаммо шахс ёки муайян гуруҳларда эмас, аксинча, муаммо бошқарув тизимида. Бу бошқарув механизми ҳар қандай гуруҳ ёки шахсни ҳокимиятга келиши билан ўз домига тортиб, олиб кириб кетади. Мавжуд бошқарув тизими ичида порахўрлик қилмай ёки иқтисодий ва сиёсий жиноят қилмай, фаолият олиб бориб бўлмайди. Ҳокимиятда, пирамида шаклидаги порахўрлик, яъни пастдан юқорига қараб тоборо кўпайиб борувчи пора бериш механизми мавжуд. Аввалги президент ва вазирларнинг деярли ҳаммаси миллионер эканлиги ошкор бўлиб бораётгани фикримизга далил бўла олади. Қирғизистон ҳам бошқа мамлакатлар сингари Коррупция ва порахўрликдан қутула олмайди. Чунки бу жиноий муаммо эмас, уни жиноятчиларга қарши кураш билангина бартараф этиб бўлмайди. Бу оламий Мабдаий муаммодир.