Путин Евросиё Иттифоқини иқтисодий суверенитетни мустаҳкамлашга чақирди
Россия президенти Владимир Путин Евроосиё иқтисодий иттифоқининг аъзоларига ўзаро молиявий битимларни ривожлантириш устида ишлашни таклиф қилди. Путинга кўра, бу ҳаракат Евросиё иттифоқи аъзоларининг суверенитетини мустаҳкамлайди.
“Замонавий молиявий техникага таянган асосни ташкил этиш (Евросиё Иттифоқи давлатлари учун) миллий тўлов тизимининг барқарорлигини таъминлайди ва доллар ёки бошқа чет эл валюталарига бўлган қарамликни камайтиради”, “Бу эса, ҳар қанақасига иқтисодий суверенитетнинг юксалишини англатади”, деди Путин Россиянинг Петербург шаҳрида бўлиб ўтган Евроосиё саммитида.
Шунингдек, Россия президенти фуқароларнинг ҳаракатини енгиллаштириш, соғлиқни сақлаш, таълим, сайёҳлик, спорт ва маданият соҳаларида яқин ҳамкорликни вужудга келтиришни таклиф қилди.
Путин Евроосиё Иттифоқига аъзо давлатлар ташқи алоқаларни кенгайтириш зарурлигига ҳам эътибор қаратди. Унинг таъкидлашича, Евроосиё иттифоқи, Мустақил Давлатлар Ҳамдўстлиги ва Жануби-Шарқий Осиё (АСEАН) давлатлари ўртасида имзоланган меморандум йирик Евроосиё ҳамкорлик лойиҳасини амалга ошириш йўлида ташланган қадамдир.
“Бугунги кунда биз Хитой билан иқтисодий тижорий ҳамкорлик шартномаси ва Эрон билан эркин савдо муваққат битими кучга кирганлигини эълон қиламиз. Цингапур, (Исроил) ва Сербия билан, кейинчалик Ҳиндистон ва Миср билан имтиёзли савдо шартномалари бўйича музокаралар муваффақиятли якунланишига умид қиламиз”, деди Россия президенти.
Евросиё Иқтисодий Иттифоқи 2015 йилнинг бошида Россия, Белоруссия ва Қозоғистон ўртасида божхона иттифоқи асосида ташкил этилган бўлиб, ўша йилнинг ўзида Арманистон ва Қирғизистон ҳам унга қўшилган эди.
Евросиё Иқтисодий Иттифоқи шартномасига кўра, барча аъзолар ўртасида товарлар, хизматлар, капитал ва меҳнат соҳаларида айрибошлаш эркинлиги ҳамда савдо, энергетика, саноат, қишлоқ хўжалиги ва транспорт соҳаларида келишилган ҳолда сиёсат олиб бориш кафолатланади.
