Қирғизистон даромадининг 35 фоизи хориждан юбориладиган пуллар ҳисобидан қопланади
Чет элда ишлаётган қирғизистонлик ишчиларнинг ўз оилаларига юбораётган пуллари ҳозирги кунда Қирғизистоннинг энг катта даромад манбаига айланиб қолмоқда.
Бир миллиондан ортиқ қирғизистонлик ишчилар хорижий мамлакатларда, хусусан, Россия ва Қозоғистонда меҳнат қилишади. Булардан 800 минг киши Россия Федерациясида оғир шароитларда ишлайди.
2017 йилда қирғиз ишчилари томонидан оилаларига юборган пулларининг жами қиймати 2,5 миллиард долларга етган. Бу рақам давлатнинг йиллик харажатларидан ҳам ортиқдир.
Қирғизистондаги кўплаб оилалар хориждан келаётган даромад билан кун кўришади. Уларнинг айтишларича, агар хорижда ишлаб юрган оила аъзолари томонидан юбориб туриладиган маблағ бўлмаса, Қирғизистонда кун кечириш ўта қийин. Хусусан, мамлакат жанубида жойлашган Баткен, Ўш ва Жалолобод каби шаҳарларда яшовчи аҳолининг аксарияти чет элда ишлаб юрган оила аъзоларининг юборадиган пулларига қарам бўлиб қолган.
Қирғизистон Марказий Осиёдаги энг қашшоқ мамлакатлардан биридир. Мамлакатнинг аксар қисми тоғли ҳудудлардан иборат.
Қирғизистон иқтисодиётининг 35 фоизи ташқи давлатларда ишлаб юрган қирғиз ишчиларини жўнатаётган пул ўтказмалари ҳисобидан қопланади. Бу соҳада Қирғизистон дунёда биринчи ўринни эгаллайди. Қирғизистондан сўнг Тонго, Тожикистон ва Гаити давлатлари туради.
