Алмазбек Атамбаев: Қирғизистоннинг ҳозирги раҳбарлари Бакиевлар йўлидан кетмоқда
Бакиевлар исталган кишини ўлдиришлари мумкинлигини кўрсатиш учун Медет Садирқуловнинг бошига етганди. Ҳозирги расмийлар эса беайб кишилар – Кубаничбек Кулматов ва собиқ бош вазир Сапар Исаковни ҳибсда сақламоқда. Бу ҳақда Қирғизистоннинг собиқ президенти Алмазбек Атамбаев “Апрель” каналига берган интервьюсида маълум қилди, дея хабар беради “K-News”.
Атамбаев президентликка номзод Сооронбай Жээнбековнинг ҳаражатлари кўрсатилган ҳужжат пайдо бўлганига изоҳ берди.
“Бу ҳужжат айнан ҳозир юзага чиқиб қолгани тушунарли – Икром Илмиянов қўлга олинган. Мазкур ҳужжатни бухгалтерияни штаб бухгалтери билган. У муддатсиз таътил олиб, бошқа давлатга жўнаб кетди. У ўз ҳаётидан хавфсирамоқда. Нафақат у, балки бу ҳужжат ҳақида билганларнинг барчаси жонидан хавотирда. Чунки ҳозирги расмийлар Бакиевлар йўлидан кетмоқда”,- деди Қирғизистоннинг собиқ президенти.
Собиқ президент амалдаги ҳокимият одамларни қўрқитиш учун гуноҳсиз одамларни қамаётганини ҳам иддао қилди.
“Улар гуноҳсиз одамларни қамаб қўйишмоқда. Қубаничбек Қулматовни, Сапар Исақовни қамаш орқали: “Биз хоҳлаган одамни қамаймиз, керак бўлса ўлдирамиз”, дейишмоқда. Шунинг учун одамлар ўз ҳаётидан хавфсирамоқда. Илмияновни қамашмаганида бу ҳужжат ошкор этилмас эди. Балки бу оила ўзларининг ҳақиқий юзларини яна анчагача яшириб юришар эди. Мени ҳайрон қолдиргани, қонунда биз махсус фонд маблағларига чекловни олиб ташлаганмиз. Агар бу тоза пул бўлса, нега ишлатилган маблағни очиқ кўрсатишмади? –деди Алмазбек Атамбаев.
Амалдаги президент Сооронбай Жээнбеков ва унинг маъмурияти Атамбаевнинг бу интервьюсига муносабат билдирмади. Аммо 16 ноябр куни “24.kg” ахборот агентлигига интервью берган Сооронбай Жээнбеков Атамбаев билан муносабатлари расман бузилганини тасдиқлаган эди.
“Мен ҳеч қачон Атамбаев билан муносабатим бузилганини айтган эмасман. Ҳа, биз узоқ вақт партиядош ва маслакдош бўлганмиз. Бироқ мендан етовдаги раҳбар ясашга ҳаракат қилиш, қанақадир учинчи шахслар орқали мени бошқаришга уриниш Атамбаевга инсон сифатида ҳам, собиқ президент сифатида ҳам, партиядош ва маслакдош сифатида ҳам обрў-эътибор келтирмайди. Менга унинг бу ҳаракатлари мутлақо тушунарсиз бўлди”, -деди Сооронбай Жээнбеков “24.kg” ахборот агентлигига берган интервьюсида.
Бишкеклик ҳуқуқ фаоли Нурбек Токтакунов 15 ноябрда Фейсбукдаги саҳифасида амалдаги президент Сооронбай Жээнбеков президент сайловида расман эълон қилинганидан кўп маблағ харжлаганини ва буни яширганини иддао қилган ҳамда “Жээнбековдан ҳам, Атамбаевдан ҳам кўнгли қолган” одам тақдим этган рўйхатни эълон қилган эди.
Фаолнинг иддао қилишича, Сооронбай Жээнбековнинг сайлов штаби Марказий сайлов комиссияси эълон қилгани каби 158 миллион 96 минг 175 сўм эмас, балки 1 миллиард 170 миллион 265 минг 187 сом ҳамда 6 миллион 855 минг 700 АҚШ доллар, жами бўлиб таҳминан 17 миллион доллар пул сарфлаган.
Нурбек Токтакунов фикрича, бу ҳолат президентга импичмент эълон қилиш учун асос бўла олади. Шунинг учун ҳам у ҳуқуқ органларидан бу ҳужжатларни текширишни талаб қилмоқда.
Президент матбуот котиби Толгонай Стамалиева эса маълумотни фейк деб атади. Бироқ президент Сооронбай Жээнбековнинг сайлов штабини бошқарган Фарид Ниёзов бу маълумот “ҳақиқатга яқин”, деб айтди.
