Эрдоған: Туркия бутун Ислом дунёсини бошқаришга қодир ягона мамлакатдир
Туркия Президенти Ражаб Таййиб Эрдоған пойтахт Анкарадаги президентлик биносида вилоят муфтийлари билан учрашувида, Туркия бутун мусулмон дунёсини бошқара оладиган ягона мамлакат эканлигини даъво қилди.
“Туркия ўзининг Тарихий мероси, географик жойлашуви ва асрлар давомида турли эътиқод вакилларининг тинчлигига кафил бўлган маданий бойлиги билан бутун Ислом дунёсини бошқаришга қодир ягона мамлакатдир”, деди Эрдоған.
Туркия президенти нутқи давомида давлат имомларини террор таҳдидларига қарши туриш учун хушёр бўлишга ва бу борада масжидлардан унумли фойдаланишга чақирди.
“Бизнинг имом-домлалар ташаббусни қўлга олмасалар, кенг майдон Фето каби адаштирувчи кимсаларга, хурофотчи жоҳилларга, телевизор орқали шармандали рақс дастурини уюштираётган масхарабозларга қолади”, “Биз масжидларимизни фақат намоз ўқиладиган, кейин эса ҳамма инсонлар у ерни тарк қилиб кетадиган ва эшиклари қулфлаб қўйиладиган маконга айлантирмаслигимиз керак. Бу Байтуллоҳнинг филиаллари ҳисобланган муборак маконларга нисбатан катта зулм ва ноҳақлик бўлади. Шунинг учун масжидларимиз доимий очиқ бўлиши керак”, дея қўшимча қилди у.
“Бугун биз бу ерда 95 йиллик Республикамизни янги бошқарув ёндашуви билан кенгайтиришга сўз бераман. Халқимиз бизга тақдим этган бу имкониятдан фойдаланиб, кучли давлат, кучли парламент ва кучли Туркия учун ҳаракат қиляпмиз. Халқимиз 24-июнда (сайловда) яна бир бор ўз вазифасини бажарди. Цивилизациямизни тиклаш ва қайта қуриш борасидаги ишларимиз жуда кўп. Бугун биз Бисмиллоҳ деб, ташлаган қадамимиздан мақсад 2023 йилга етишдир”, дея Лозанна битимининг тугашига ишора қилди Эрдоған.
