Франция ва Германия АҚШ санкцияларини четлаб ўтиш бўйича иш бошлади
Франция ва Германия вакиллари АҚШнинг Эрон каби давлатларга санкцияларини четлаб ўтишга имкон берувчи молиявий ечимлар ва тўлов каналлари устида иш бошлашганини маълум қилишди.
Bloomberg ахборот агентлигининг маълум қилишича, муҳокамаларда Буюк Британия ҳам иштирок этмоқда. Давлатлар АҚШ санкцияларини четлаб ўтишга имкон берувчи муқобил тизимларни яратиш учун ўз марказий банкларини жалб қилиш имкониятини кўриб чиқишмоқда.
Франция молия вазири Бруно Ле Мэрнинг айтишича, Париж ва Берлин икки томонлама ёки умумевропа мустақил молиялаштириш каналларини яратишни муҳокама қилмоқда.
“Мен Европани вассал эмас, суверен қитъа сифатида кўришни истардим ва бунинг учун бугунги кунда мавжуд бўлмаган, молиялаштиришнинг тўлиқ мустақил воситалари лозим”,- деб айтган Ле Мэр.
Унинг айтишича, мавжуд каналлар, жумладан Европа инвестиция банкидан фойдаланиш жуда мураккаб бўлади, чунки АҚШ уларнинг операцияларига билвосита тарзда таъсир қилиши мумкин.
Шу билан бирга Германия ташқи ишлар вазири Хайко Мааснинг айтишича, Европа Иттифоқи тўловларни кўпроқ мустақил қилиш учун SWIFT каби тўлов каналлари ва тизимларини модернизациялаш бўйича таклифлар устида ишламоқда.
“Вашингтон томонидан ўтказилаётган санкциялар сиёсати бизни жавоб беришга мажбур қилмоқда. АҚШ Россия, Хитой, Туркияга ва келгусида эҳтимол бизнинг муҳим савдо ҳамкорларимизга қарши тўсатдан ва келишмаган ҳолда, кўп маротаба санкциялар қўллаганда бу Европа ва хусусан Германияга таъсир қилади”,- деб айтган Маас.
АҚШ ва Европа ўртасидаги муносабатлар охирги вақтда АҚШ президенти Дональд Трамп ўтказаётган савдо сиёсати ва Эрон ядровий дастуридан воз кечиш қарори сабабли кескинроқ тус олди.
