Сергей Лавров: Биз АҚШнинг қаршисида ожиз бўлиб қолишга рози бўлолмаймиз
Россия ташқи ишлар вазири Сергей Лавров янги қуролларни ишлаб чиқиш ва ривожлантириш давлат хавфсизлигини таъминлаш учун зарурлигини билдирди. Унинг айтишича, Москва ҳукумати Қўшма Штатлар қаршисида қуролсиз ожиз туриши мумкин эмас.
“2002 йилда Президент Владимир Путин АҚШнинг (ракета мудофаа тизими) шартномасидан чиқишини хато эканлигини айтган эди. Бунга жавобан ўша пайтдаги АҚШнинг президенти кичик Буш Американинг ракета мудофаа тизимини қуришга эътиёжи борлигини ва бу Россияга қарши қаратилмаганлигини, балки Эрон ва Шимолий Корея каби бошқа мамлакатларга қарши қаратилганлигини билдирган эди”, деди Лавров “РТ” канали билан ўтказган суҳбатида.
“Ракета мудофаа тизимларини чеклаш шартномаси АҚШ ва Совет Иттифоқи томонидан 1972 йил май ойида имзоланган эди. Лекин уни амалга ошириш учун муайян вақт белгиланмаган. 2001 йилда Вашингтон шартномадан чиқишини эълон қилди. 2002 йилда эса икки мамлакат ўртасидаги ракета мудофаа шартномаси тўхтатилди”, дея қўшимча қилди Лавров.
Россия ташқи ишлар вазирининг сўзларига кўра, шундан сўнг Россия ўз манфаатларини ва миллий хавфсизлигини ҳимоя қила оладиган янги қуролларни ишлаб чиқара бошлаган.
“Қўшма Штатлар шартномадан чиқди. Биз ҳам АҚШ қуролларидан устун турадиган ўзимизнинг янги қуролларимизни ривожлантира бошладик. Чунки биз янги қурол-аслаҳалар ва стротегик ракета мудофаа тизимига эга бўлган Америка Қўшма Штатлари қаршисида ожиз бўлиб қолишга асло рози бўлмаймиз. Биз ҳозирги вазиятда қайсидир йўл билан фақат ўзимизнинг хавфсизлигимизни ҳимоя қилиш учун ҳаракат қиляпмиз, бошқа нарса учун эмас. Бизнинг бошқа бировларга ҳужум қилиш ниятимиз йўқ. Аммо бизга қарши қаратилган ҳар қандай ҳужумлардан ўзимизни қониқарли даражада ҳимоя қилишни истаймиз”, дея ўз сўзларини изоҳлади Россия ташқи ишлар вазири.
Россия президенти Владимир Путин аввалроқ 1 март куни кашф қилинган янги Рус қуроли Россиянинг даражасини йирик ҳарбий кучлар билан стратегик тенглигини таъминлашга кафил бўлишини эълон қилган эди.
