Путин: Ғарбнинг қизил чизиқни босиб ўтиши асло мумкин эмас
Россия президенти Владимир Путин Ғарб давлатларини Россия билан муносабатларда “қизил чизиқ”дан ўтиб кетмасликка чақирди. Владимир Путин бу ҳақида Петербург халқаро иқтисодий форуми доирасида айтиб ўтди.
“НАТОнинг чегараларимизга яқин бўлишидан ташқари, улар эртага Украинани ўзларига қўшиб олишлари ва у ерда радар ёки ракета мудофаа тизимларини ўрнатишлари борасида бизда шубҳа пайдо бўмоқда”, – деди Путин бир нечта оммавий ахборот агентликларига берган интервюсида.
Россия президенти Ғарб давлатларидан Россиянинг манфаатларига ҳурмат билан қарашни талаб қилар экан, “Бу ерда муайян ҳудудлар мавжуд. Қизил чизиқни босиб ўтиш асло мумкин эмас”, дея қўшимча қилди.
Путиннинг таъкидлашича, Россияни турли жиноятларда айблаш “халқаро муносабатлар тизимини бузадиган хавфли вазият”ни юзага келтиради.
Шунингдек, Владимир Путин Россиянинг бошқа мамлакатлар ишларига аралашуви, хусусан Британиянинг Европа Иттифоқидан чиқиши ва Испаниянинг Каталония референдиумига аралашуви ҳақидаги тахминларни рад этди. Унга кўра, бу ишлар Москванинг манфаатларига тўғри келмайди. У ушбу масалалар борадаги Москвага тегишли бўлган барча айбловларни “бемаънилик” деб атади.