Туркманистонда намозга таъқиқ қўйилмоқда
Дашўғуз хавфсизлик хизмати ходимлари диндорларни сўроқ қилмоқда ва улардан ибодатлар – намоз ўқишлари тўхтатилишини талаб қилмоқда. Бу ҳақда “Озодлик” радиосининг Дашўғуздаги мухбирлари маълум қилди.
“Дашўғузда миллий хавфсизлик хизмати масжидларга ташриф буюрувчи диндорларни, шунингдек пенсия ёшига етмаган давлат хизматчиларини ва уйида ёки ишхонада намоз ўқиётганларни чақириб, сўроқ қилмоқда. Уларга қуйидагича савол беришмоқда: Нима учун намоз ўқийсиз? Ким билан мулоқот қиласиз? Ота-онангиз ким? Шундан сўнг улардан намоз ўқимаслик ва масжидга бормаслик талаб қилинмоқда”, – дейди манбалардан бири.
Унинг сўзларига қараганда, сўроқ қилинганлар “масжид ёки ишхонада намоз ўқиш давом этаверадиган тақдирда, диндорлар ишдан бўшатилиши” ҳақида огоҳлантирилмоқда.
“Ҳеч қаерда ишламаётган ва ёшлардан Туркияда ишлаган ёки ишламаганлари, у ерда қариндошлари ишлаяптими, қайси русумдаги телефондан фойдаланиши, телефонида диний даъватлар бор ёки йўқлиги сўралмоқда”, – дея хабар беради “Озодлик” суҳбатдошлари ва аввал Туркияда ишлаб келганлар бирма-бир сўроқ қилинаётганларини ўз сўзларига қўшимча қилди. Туркияда ишлаб келганларнинг атрофидагилар, танишлари суриштирилмоқда. Соқоли бор ёшларни соқолларини олиб ташлашга мажбурлашмоқда, шундан кейингина қўйиб юборишмоқда.
Суҳбатдошларнинг сўзларига қараганда, тергов ўтказаётган куч ишлатиш салоҳиятига эга идоралар ходимлари диндорларни нима сабабдан сўроқ қилаётганлари сабабларини тушунтиришмаяпти. Бундан ташқари, минтақадаги бир нечта манбанинг айтишича, Сапармурат Туркманбоши туманидаги бир қатор қишлоқларда маҳаллий маъмуриятларга намоз ўқиётган диндорларнинг рўйхатини тузиш топширилган.
Туркистон:
Туркманистоннинг собиқ президенти, Сапармурод Ниёзов ёзганлиги даъво қилинган “Руҳнома” китоби нашр қилинганидан сўнг оммавий ахборот воситаларида “Туркманбоши” Ниёзов пайғамбар деб талқин қилина бошлади. Ўшанда туркманистонлик диний олим Хожааҳмад Ўрозқличев бу мусулмонлар эътиқодига зид эканлигини айтиб чиқиши ортидан Президент Ниёзов Ислом динига қарши курашни кучайтириб юборган эди. Олимнинг ушбу сўзларидан сўнг туркман ҳукумати Ўрозқличев таржимасидаги туркман тилида чоп этилган 40 минг нусха Қуръонни ёқиб юборишга буйруқ берди. Шу билан кифояланиб қолмаган расмий ҳукумат пойтахт Ашхободдаги масжидларни тенг яримини бузиб ташлади ва мусулмонларни турли хил айбловлар билан қамоққа ташлай бошлади. Ҳуқуқ фаоллари берган маълумотларга кўра, қаттиқ режимли “Овадон Тепа” турмасида 300 га яқин диндор маҳкумлар бор. Уларга яқинлари билан учрашиш, ташқаридан бирор нарса олиб киритиш таъқиқланган.
Миллий хавфсизлик бошқармаси ва йўл назорати хизмати ходимлари соқол қўйган ва 50 ёшга тўлмаган мусулмон эркакларни ушлаб, махсус суҳбатдан ўтказиш ортидан, уларнинг соқолларини мажбуран олиб ташлаш ҳолатлари ва ҳатто ароқ ичиб, уларни чўчқа гўшти ейишга мажбурлаш ҳолатлари кузатилди. Куч органлари талабини бажармаган эътиқодли мусулмонлар эса ҳеч қандай суд ва терговсиз 7-8 йилга озодликдан маҳрум этилди. Бунинг натижасида режим қамоқхоналари мусулмонлар билан тўлиб тошди. Ўтган йилнинг баҳор ойларидан бошлаб Мудофаа вазирлигида хизмат қилган ҳамда намоз ўқиган ҳарбий хизматчиларни ишдан бўшата бошлаган эди. Бугунга келиб эса барча давлат хизматчиларига намоз ўқиш таъқиқланди.
