Европарламент: Россия АҚШни Марказий Осиёдан сиқиб чиқармоқда
Вашингтон Россия таъсири кучайганлиги туфайли Марказий Осиёда ўз позицияларини йўқотмоқда. Бу ҳақда Европарламент баёнотига таянган ҳолда РИА Новости хабар бермоқда.
“АҚШнинг Марказий Осиёда таъсири сустлашганини бир жиҳатдан Афғонистондаги операциялар кўлами пасайганлиги билан боғлаш мумкин. Лекин асосий сабаб минтақанинг Россия таъсирига қайтганлигидир. Қозоғистон, Қирғизистон ва Тожикистон Россиянинг ҳарбий иттифоқдошлари саналади. Айнан Россия, 2014 йилда, Қирғизистонни АҚШ билан “Манас” авиабазаси бўйича битимни узайтирмасликка кўндирган эди”,- дейилган ҳисоботда.
Ҳужжатда, шунингдек, АҚШ Россия орқали Афғонистонга қурол-яроғ транспортировка қилиш имкониятидан маҳрум бўлганлиги ҳам эслатиб ўтилган. 2015 йил Россия Бош вазири Дмитрий Медведев АҚШга 2008 йилдан буён қурол-яроғ ва аслаҳаларни транспортировка қилиш имкониятини бериб келаётган Шимолий тармоқ бўйича транзитни ёпган эди.
Бундан ташқари, Европарламент, Вашингтон Марказий Осиё мамлакатларида савдо даражаси бўйича ҳам Москвадан анча ортда қолаётганини қайд этган. 2016 йилда АҚШнинг минтақа мамлакатлари билан амалга оширган савдо ҳажми 2,4%ни ташкил қилган бўлса, Россиянинг бу бозордаги улуши 18% даражасида сақланиб келмоқда.
АҚШнинг роли пасайиши Вашингтоннинг минтақага миллиардлаб маблағ киритиши фонида рўй берди, улар Марказий Осиё давлатларига инвестициялар кўринишида кириб келмоқда.
“Қозоғистон, айниқса унинг иқтисодиёти нефть сектори Ўрта Осиёдаги Америка инвестицияларининг энг йирик объекти саналади. 2017 йил ҳолатига кўра, АҚШнинг бу давлатга тўғридан-тўғри сармоялари 25 млрд долларни ташкил этди. Натижада Қўшма Штатлар Қозоғистонда катталиги бўйича иккинчи хорижий инвесторга айланди. Бундан ташқари, АҚШдан сармоялар оқими тезлашди, ва уларнинг ҳажми 2017 йилнинг биринчи ярмида 2,3 млрд долларлик рекорд даражага ўсди”, – дея таъкидланади ҳисоботда.
