БМТ Хавфсизлик Кенгаши Аракан қирғинини яна қаттиқ қоралади
Бирлашган миллатлар ташкилотининг хавфсизлик кенгаши Бирмадаги араканлик Мусулмонларга қарши уюштирилган зўравонликларни муҳокама қилиш учун яна йиғилиш ўтказди. Аммо бу галги йиғилиш матбуотдан холи, ёпиқ эшиклар ортида бўлиб ўтди. Сентябр ойидан бошлаб БМТ Хавфсизлик Кенгашига раислик қила бошлаган Эфиопиянинг БМТдаги доимий вакили Текеда Алему йиғилишдан сўнг журналистларга баёнот берди.
“БМТ Хавфсизлик Кенгаши Бирма хавфсизлик кучлари томонидан тинч аҳолига қарши куч ишлатилганлигидан ташвишда. У Тинч аҳолига қарши ҳужумларни қоралайди. Кенгаш Аракандаги зўравонликларни дарҳол тўхтатишга ва тинч аҳолини ҳимоя қилишга чақиради”, деди Бирма ҳукуматини мазлумларга гуманитар ёрдам кўрсатишда БМТ ва бошқа ёрдам ташкилотлари билан ҳамкорлик қилишга чақирган Алему.
БМТ бош котиби Антонио Гутеррес ҳам БМТ Бош Ассамблеясининг 72-сессиясидан олдин ташкил қиинган матбуот анжуманида Бирмадаги Араканлик мусулмонларга қарши зўравонликлар ҳақида тўхталди. У Араканлик мусулмонларга қарши қўлланган зўравонликларни “номақбул иш”, дея атаб, Бирма ҳукуматини ҳарбий амалиётларни тўхтатишга, зўравонликларга чек қўйишга ва инсонпарварлик ёрдами учун изн беришга чақириш билан кифояланди.
Туркистон:
Ислом ўлкаларининг раҳбарлари Аракан қирғини ҳақида гап очганда бу масаланинг ечимини БМТга ҳавола қилиш билан чекланишмоқда. Аслида БМТ Аракан Мусулмонларига нисбатан қўлланаётган ваҳшийликлардан яхшигина хабардор. У ўзининг Аракан ҳақида берган аввалги баёнотларининг бирида “дунёнинг энг мазлум халқи Аракан Мусулмонаридир” дея айтиб ўтган эди. Аммо шундай бўлишига қарамай, “фақат ташвиш билдириш”, “қаттиқ қоралаш” билангина чекланмоқда. Бунинг сабаби нимада?!
БМТга икки юзга яқин давлат аъзодир. Аммо БМТ улардан фақат доимий бешта аъзосини, яъни АҚШ, Россия, Англия, Хитой ва Франция давлатларининг манфаатларини ҳимоя қилади, хусусан булар орасида АҚШнинг манфаати биринчи ўринда туради. Мазкур беш доимий аъзо давлатлар БМТ тарафидан қабул қилинадиган бирор қарорга ВЕТО қўядиган бўлса, қолган икки юзга яқин давлатларнинг заррача ҳам таъсири қолмайди. Қизиғи шундаки, дунёнинг қаерида қон оқаётган бўлса, унинг орқасида мана шу беш давлатдан бири турган бўлади.
Демак БМТга мурожаат қилиш мазкур беш давлатга, хусусан АҚШга мурожаат қилиш маъносини англатади. Ваҳолангки бу зулмларни амалга ошираётган давлатнинг раҳбарига “тинчликни сақлаш бўйича нобел мукофоти”ни АҚШнинг ўзи топширган. Шундай экан, БМТга мурожаат қилиш ва у ердан танқид қилиш ҳақида қарорлар чиқартириш мусулмонларнинг муаммосига ечим бўладими?!
