Россия (насиб қилса) Сурияда яна 50 йил қолишни кўзламоқда
Россия Президенти Владимир Путин Россия қўшинлари узоқ муддат Сурияда қолиши назарда тутилган битимга имзо чекди. Битимга биноан, Россиянинг ҳаво базаси яна 50 йил давомида Сурияда фаолият юритадиган бўлди.
Ўтган январ ойида Россия ва Сурия ўртасида Дамашқда имзоланган шартнома бўйича Суриянинг Латакия вилоятида жойлашган Россиянинг Ҳмеимим ҳарбий ҳаво базаси Асад кучларига имкониятлар яратиб берганлиги ҳақида хабарлар тарқаган эди. Хабарда айтилишича, Сурия режимига қарашли кучлар мухолиф кучларга қарши ҳаво ҳужумларини уюштириш учун Россиянинг Суриядаги ҳарбий ҳаво базасидан фойдаланган.
Ҳукуматга қарашли расмий ахборот порталининг хабар қилишича, Россия президенти Чоршанба куни шартномани тасдиқлаган. Мазкур битим жорий ойнинг бошида ҳар икки давлатнинг ҳукумат кенгашлари тарафидан қўллаб қувватлангани айтилмоқда. Шунингдек хабарда айтилишича, Россия кучларининг Ҳемеимим ҳаво базасида 49 йил бўйича қолиши ва бу муддат 25 йилга узайтирилиши муҳокама қилинган.
Башар Асад “Сана” ахборот агентлиги орқали Россия ҳукуматига “Бу миллий урушда Рус биродарларимизнинг ёнимизда турганлигини Сурия ҳалқи унутмайди”, дея ташаккур билдирди.
