АҚШ Мудофаа вазири Жим Маттис вазифасини бошлагандан буён илк бор Яқин Шарқ ва Шимолий Африка сафарини бошлади. Маттис 18 апрелдан 23 апрелгача Саудия Арабистони, Исроил, Қатар, Миср ва Жибути давлатларини айланиб чиқади. АҚШ расмийларига кўра, Маттиснинг вазифаси ИШИДга қарши кураш ва Трампнинг Сурияга доир сиёсатини уларга етказишдир. Маттис сафарини Саудия Арабистонидан бошлади.
Саудия Арабистони Қроли Салмон бин Абдулазиз Пентагон раҳбарини пойтахт Ар-Риёддаги Ямома саройида қабул қилди. Саудия Арабистони расмий ахборот агентлиги “SPA”нинг хабарига кўра, учрашув чоғида асосан мудофаа соҳасини кучайтириш ва икки давлат ўртасидаги стратегик дўстона муносабатларни янада мустаҳкамлаш ҳамда минтақавий ва халқаро ўзгаришлар борасидаги масалалар муҳокама қилинган.
Ар-Риёд шаҳрида ташкил қилинган матбуот анжуманида Жим Маттис Саудия Арабистонининг минтақа ва АҚШ манфаатлари учун хавфсизлик устуни бўлишда давом этаётганлигини билдирди.
Мутахассисларнинг таъкидлашича, АҚШнинг иттифоқчилари АҚШ президенти Доналд Трампдан Сурия сиёсатига доир жуда кўп саволларга жавоб кутмоқда. Улар ИШИДдан тозаланган жойлар этник ёки мазҳаблараро низоларга саҳна бўлмаслиги учун ёки бу минтақалардаги “экстремистик” ташкилотларнинг қайта жонланишини олдини олиш учун Вашингтон қандай стратегиялар ишлаб чиққанлиги ҳақида эшитишни истайди. Бироқ АҚШ ИШИДни йўқ қилгандан сўнг қандай йўл тутиши ва Саудия Арабистони каби иттифоқчиларига қандай рол топширишини ҳануз маълум қилган эмас.
