Путин: АҚШнинг ҳаракатлари тажовуздан иборат
7 апрелга ўтар кечаси АҚШ президенти Дональд Трампнинг кўрсатмаси бўйича 59та “Томагавк” русумли қанотли ракетаси Ўрта Ер денгизи ҳудудидаги кемадан туриб Хомс вилоятидаги нишонга учирилди. Америкаликлар ушбу ҳужум бир неча кун олдин Идлибда кимёвий қурол қўлланганига жавобан амалга оширилганини билдиришди.
“Россия 24” телеканалининг маълум қилишича, АҚШ армиясининг Суриядаги авиабазага йўллаган зарбалари оқибатида 7 киши ҳалок бўлган, яна 7 киши жароҳатланган.
“Хомс вилоятида қурбон бўлганлар сони ҳақида сўнгги маълумотлар берилди. Вилоят губернаторининг айтишича, 7 нафар ҳарбий ҳамда тинч аҳоли вакили бўлган икки киши ҳалок бўлган. Яна 7 киши оғир жароҳатлар олган”,- дейилади хабарда.
АҚШ томонидан амалга оширилган ракета ҳужумидан сўнг Россия президенти Владимир Путин Россия хавфсизлик кенгаши аъзолари билан шошилинч йиғилиш ўтказди. Бу ҳақда президент матбуот котиби Дмитрий Песков маълум қилган.
Унинг аниқлик киритишича, “Вашингтоннинг ҳаракатлари яна бир бор халқаро ҳуқуққа зид келувчи агрессия акти” сифатида баҳоланган.
“Йиғилишда рўй берган ҳодисадан чуқур хавотир билдирилиб, бундай тажовузкор ҳаракатнинг салбий оқибатларидан қочиб қутулиб бўлмаслиги қайд этилди”,- деган Песков.
Бундан ташқари, ушбу ҳужум АҚШ ва Россия муносабатларига катта зарар келтиргани афсус билан таъкидланган.
Мажлисда бош вазир Дмитрий Медведев, Давлат думаси спикери Вячеслав Володин, президент маъмурияти раҳбари Антон Вайно, Хавфсизлик кенгаши раҳбари Николай Патрушев, Мудофаа вазири Сергей Шойгу, ИИВ раҳбари Владимир Колокольцев, ФХХ директори Александр Бортников, Россия Ташқи разведка хизмати директори Сергей Наришкин, шунингдек президентнинг табиатни муҳофаза қилиш, экология ва транспорт масалалари бўйича махсус вакили Сергей Иванов иштирок этган.
