Қирғизистондаги диний вазият муҳокама қилинди
“vb.kg” интернет нашрининг хабар қилишича, Қирғизистон президенти Алмазбек Атамбаев 31 март куни Қирғизистон республикаси Дин ишлари бўйича давлат комиссияси директори Зайирбек Эргашов ва Қирғизистон мусулмонлари диний бошқармаси раҳбари, муфтий Мақсад ҳожи Токтомушевни қабул қилди. Бу ҳақида президент маъмурияти ахборот сиёсат бўлими маълум қилган.
Хабарга кўра, учрашувда дин соҳасидаги ҳозирги вазият, унинг ривожланиш тенденциялари ва бу борада давлат сиёсати самарадорлигини янада ошириш бўйича кўрилаётган чора-тадбирлар муҳокама қилинган.
Зайирбек Эргашов диний таълим соҳасида амалга оширилаётган ислоҳотлар, мамлакатда радикаллашув ва экстремизмга қарши курашда давлат, диний бошқарма ва диний етакчиларнинг ҳамкорликдаги ҳаракатларини тартибга солишни янада фаоллаштириш зарурлиги ҳақида айтиб ўтди. Шунингдек, диний соҳада давлат сиёсати концепциясини амалга ошириш бўйича батафсил тушинтириш бериб ўтди.
Президент Алмазбек Атамбаев давлат идоралари, диний ташкилот ва уламолар давлатчилик ва халқ бирлигини мустаҳкамлашда бундан буён ҳам ҳамкорликда иш олиб боришлари муҳимлигини алоҳида белгилаб ўтди. Атамбаев шунингдек, Қирғизистондаги диний вазиятни мониторинг қилиш ва олдини олиш қўшма чора-тадбирлар муҳим аҳамият касб этишига эътибор қаратиш лозимлигини таъкидлади.
Туркистон:
Атамбаев апрел ойида бўлиб ўтадиган муфтий сайлови олдидан, ўзига қулай ва манфаатли номзоднинг яна бир маротаба ваъдасини олиб қўймоқчи бўлди. Сайловда Чубак ҳожининг ҳам иштирок этиши кутиляпти. Унинг обрўйи жуда баланд. Лекин уламолар кенгаши Атамбаевнинг ГКНБ ташкилотининг қўлида. Шунинг учун муфтийликка сайлов шунчаки расмиятчилик холос. Ким муфтий бўлишини президент белгилайди.
