АҚШ Давлат котиби Туркияда
АҚШ Давлат котиби Рекс Тиллерсон расмий сафар билан Туркияга келди. Ироқда ва Сурияда ваҳшийларча қирғинларни амалга оширган мустамлакачи АҚШ давлат котиби аввал Туркия бош вазири Бинали Йилдирим билан учрашди. Расмий учрашув ёпиқ эшиклар ортида 40 дақиқа давом этди. Сўнгра уни Туркия президенти Ражаб Тоййиб Эрдуғон ўзининг президентлик саройида қабул қилди. Вазирлик тарафидан берилган баёнотда айтилишича, ўзаро суҳбатда Ироқ, Сурия, ИШИД ва Гулен масалалари кўриб чиқилган.
“Учрашувда Ироқ ва Сурияни ИШИДдан тозалаш учун олиб борилаётган ҳаракатлар ва Фатҳуллоҳ Гуленни мамлакатга қайтариш масалалари муҳокама қилинди. Шунингдек, минтақавий масалаларда икки тарафлама ҳамкорликни кучайтириш масаласига ҳам тўхтаб ўтилди. Оқ уй идорасида ўзгариш юз бергандан сўнг илк бор мамлакатимизга қилинган ташрифда икки иттифоқдош давлат ўртасидаги тиғиз алоқалар келгуси кунларда ҳам давом этиши борасида келишиб олинди”, дейилади баёнотда.
20 январ куни Доналд Трампнинг АҚШ президент курсисига ўтириши АҚШ тарафидан ЙГПга берилаётган ёрдамларни тўхтатиш ва Гуленни Туркияга қайтариш борасида Анқаранинг умидини уйғотган эди. Аммо орадан икки ойдан ортиқ вақт ўтган бўлса ҳам, Вашингтон бу соҳада бирор қадам ташламади. Трамп одим-одим Обаманинг сиёсатини давом эттириб келмоқда. Шундай бўлишига қарамай Анқаранинг Вошингтон билан ҳамкорлигини давом эттириши, воз кечиб бўлмайдиган муҳим сиёсат бўйича қолмоқда.
Айни пайтда АҚШ Давлат котибининг ташрифи олдидан терроризмга қарши кураш баҳонасида мусулмонларнинг уйларига босқин уюштирилди. Туркиянинг Адана вилоятида 500 нафар полийциячи 19 манзилни босиб, ИШИД ва Жабҳатун Нусра ташкилотларига аъзо деган гумонда 21 кишини қўлга олди. Гувоҳларнинг билдиришича мусулмонларни қўлга олишда полициячилар худди Россия полицияси мусулмонларни террор айби билан қўлга олаётган ҳаракатлари каби ҳаракатларни амалга оширган. Агар турк ҳукумати ҳақиқатдан ҳам террорга қарши кураш даъвосида содиқ бўлса, АҚШ, Россия ва Британияга қарши куришиши лозим эди. Чунки бу давлатлар Ироқ, Афғонистон, Сурия, Чеченистон каби дунёнинг турли ўлкаларида террорчиликни амалга ошириб келмоқда.