Ё намоз ёки иш
“CA-NEWS” сайтининг хабар қилишича, Туркманистонда намоз ўқиган ҳарбий тизим ходимларини ҳамда намоз ўқишни ташлаш талабини бажаришдан бош тортган давлат хизматчиларини ишдан бўшатиб юбориш ҳолатлари кўпайиб бормоқда.
Хавфсизлик сабабларига кўра исмини ошкор қилишни истамаган туркманистонлик, эндиликда собиқ харбийнинг маълум қилишича, намоз ўқишни ташлаш талабини рад этгани сабабли қуролли кучлар сафидан бўшатиб юборилган. Унинг сўзларига кўра, аввалига иш жойида намоз ўқимасликни талаб қилишган, кейин эса уйида тинтув ўтказиб, Қуръон китобини олиб кетишган.
Собиқ ҳарбийнинг айтишича, бўлиб ўтган ишларга қарамай у намоз ўқишда давом этган. Шундан сўнг уни Мудофаа вазирлигига чақиртиришган ҳамда ундан тушинтириш хати ва ишдан бўшаш тўғрисида ариза ёзишни талаб қилиб, ишдан бўшатиб юборишган. Бундан ташқари, ундан оиласи билан яшаётган вазирлик томонидан берилган уйни бўшатиб қўйишни талаб қилишган.
Туркистон:
Туркманистоннинг собиқ президенти, марҳум Сапармурод Ниёзов қаламига мансуб “Руҳнома” китоби нашр қилинганидан сўнг оммавий ахборот воситаларида “Туркманбоши”ни пайғамбар деб атала бошланишига қарши туркманистонлик диний уламо Хожааҳмад Ўрозқиличев “Бу мусулмонлар эътиқодига зид” эканлигини айтиб чиқиши ортидан Туркман ҳукумати Ислом динига қарши курашни бошлаб юборган эди. Уламонинг шу сўзларидан сўнг туркман ҳукумати Ўрозқличев таржимасидаги туркман тилида чоп этилган 40 минг нусха Қуръонни ёқишга буйруқ берди. Шу билан кифояланиб қолмаган расмий ҳукумат пойтахт Ашхободдаги масжидларни тенг яримини бузиб ташлади ва ўз эътиқодида собит турган мусулмонларни турли хил айбловлар билан қамоққа ташлай бошлади.
Туркманбошидан сўнг ҳокимият тепасига келган Гурбангули Бердимуҳаммедов Ислом ва мусулмонларга қарши курашни янада кучайтириб юборди. У эндиликда нафақат уламо ва масжидларга қарши, балки жамиятда исломий кўринишларга қарши курашни бошлаб берди. Ҳукумат буйруғига биноан Дошўғиз вилоятида куч органлари соқол қўйган мусулмонларга қарши “ов”ни бошлаб юборишди. Миллий хавфсизлик бошқармаси ва йўл полицияси ходимлари соқол қўйган ва 50 ёшга тўлмаган мусулмон эркакларни ушлаб, махсус суҳбатдан ўтказиш ортидан, соқолларини мажбуран олиб ташлашди ва ҳатто уларни ароқ ичиб, чўчқа гўшти ейишга мажбурлашди. Куч органлари талабини бажармаган эътиқодли мусулмонлар эса ҳеч қандай суд ва терговсиз 7-8 йилга озодликдан маҳрум этилди. Бунинг натижасида эса режим қамоқхоналари мусулмонлар билан тўлиб кетди.
Ҳуқуқ фаоллари берган маълумотларга кўра, биргина қаттиқ режимли “Овадон Тепа” турмасида 300 га яқин диндор маҳкумлар бор. Уларга яқинлари билан учрашиш, ташқаридан бирор нарса олиб киритиш тақиқланади.
Аллоҳга қарши қилган шунча жиноятлари камлик қилганидек эндиликда расмий ҳукумат намоз ўқиган мусулмонларга қарши босим ўтказишни бошлаб юборди.
