Ўзбекистоннинг фаоллашуви Қозоғистонни хушёр торттирди
“Независимая газета”нинг ёзишича, узоқ танаффусдан сўнг Европа тикланиш ва тараққиёт банки президенти Сума Чакраборти бошчилигидаги делегациянинг Ўзбекистонга келиши қўшни Қозоғистонни хушёр тортишига сабаб бўлган.
Қозоғистон иқтисодиёт вазири Темур Сулейменов Олмаотада ўтаётган CFO Summit 2017 саммитида сўзлаган нутқида, “Ўзбекистоннинг минтақавий позицияларининг мустаҳкамланиши Марказий Осиё минтақасида иқтисодий етакчининг ўзгаришига олиб келиши ҳамда инвестициялар ва бозорлар учун рақобатни кучайтириши мумкин”лигини айтиб ўтган.
Вазир Қозоғистонга хавф солаётган ташқи чақириқлар ҳақида гапирар экан, “уйғонаётган ва эркинлашаётган Ўзбекистон”га эътибор қаратди. У Ўзбекистонни катта амбициялар ва имкониятларга эга давлат деб атади.
“Ўзбекистоннинг кучайиши биз учун муайян чақириқ бўлади. Биз объектив равишда Қозоғистон минтақадаги гегемон деб ўйлашга одатланиб қолганмиз. Ҳозир бу ўзгариши мумкин, мен иқтисодий гегемонни назарда тутмоқдаман. Инвестициялар, бозорлар учун рақобат кучайиши мумкин. Бу биз ўрта муддатли истиқболда ҳал қилишимиз керак бўлган чақириқлардан бири”,- деган Сулейменов.
Сулейменов ташқи чақириқлар сифатида Хитой ва АҚШ ўртасида вужудга келаётган савдо ихтилофини ҳам айтиб ўтди. У АҚШнинг сиёсати олдиндан айтиб бўлмас ҳолга келаётгани ва бу Қозоғистон иқтисодиётига хавф солиши мумкинлигини таъкидлаб ўтди.
“АҚШнинг иқтисодиёти ва сиёсий таъсири кўлами улканлигини ҳисобга олган ҳолда, бу янги реалликка айланиши мумкин. Протекционизм, қандайдир келишувлардан бош тортиш, миграция сиёсатининг бошқа жиҳатларидаги изоляционизм трендга айланиши мумкин. Чунки Америка трендларни ўрнатувчи давлатдир”,- дея сўзни якунлаган Сулейменов.
