Исроил: Туркиядаги референдум Исроил учун ҳам муҳим аҳамиятга эга
Туркия ва Исроил ўртасида юзага келган илиқ муносабатлар ортидан икки давлат делегацияларининг ўзаро ташрифи жадаллашди. Туркия маданият ва туризм вазири Наби Авжининг Исроилга қилган сафаридан бир ой ўтиб, журналистлар делегацияси биринчи марта Туркиядан Исроилга йўл олди.
Турк журналистлари билан учрашиб, уларнинг саволларига жавоб берган Исроил Ташқи ишлар вазирлигининг матбуот котиби Эммануэль Нахшон 16 апрел куни Туркияда ўтказилиши мўлжалланган референдумнинг Исроил учун ҳам муҳим аҳамиятга эгалигини маълум қилди. Нахшоннинг таъкидлашича, Туркия президенти Ражаб Тоййиб Эрдуғон Яқин Шарқ минтақаси учун муҳим шахс ҳисобланади.
“Исроил Туркияда нима бўлаётганини диққат билан кузатиб бормоқда. Мамлакатингизда бўлаётган ҳамма ишларнинг бизга яқиндан тааллуқли жойи бор. Туркия демократик давлат сифатида ўз йўлини танлайди. Бу референдумнинг аҳамияти жуда катта. Чунки Эрдоған жуда муҳим минтақавий актёрдир. Унинг сиёсий келажаги Яқин Шарқнинг келажаги учун муҳим аҳамият касб этади”, деди Нахшон.
Наҳшонинг қайд этишича, Исроил ва Туркия ўртасида энергетика борасида ҳам кучли ҳамкорлик мавжуд. Исроил энергетика вазири Ювал Стеинитз апрел ойида Туркияга бориши кутилмоқда.
Айни пайтда Туркия ва Исроил ўртасидаги тижорат ҳажми кундан кунга ортиб бораётгани айтилмоқда. Исроилнинг Анқарадаги элчиси Эйтан Ноэга кўра, икки давлат ўртасидаги қарийб 4 миллиард долларлик тижорат ҳажмининг имконияти бунинг икки баробарига тенгдир. Бу ҳажм бир неча йилда 8 миллиард долларга етади.
“Икки давлат ўртасидаги энергетика ҳамкорлигини кучайтириш ниятидамиз. Биз бу имкониятга эгамиз. Мажбурият ва ишонч тамойилларига асосланган алоқаларимиз контекстида олдимизга қўйган мақсадимизга етишимиз мумкин. Исроилга кўпроқ сармоя ётқизилишини истаймиз. Баъзи ноқулайликларга қарамай, биз Туркия иқтисодиётига ишонамиз”, дейди Эйтан Ноэ.
