Қирғизистон яна қашшоқ давлатлар сафида
Қирғизистон президенти Алмазбек Атамбаев бундан икки йил олдин ОАВ берган интервьюсида, Халқаро ҳамжамият эндиликда Қирғизистонни қашшоқ давлат деб ҳисобламаслигини маълум қилган ва “Кўпчилик, шу жумладан ОАВлари ҳам бу хабарга жиддий эътибор қаратишмади, аммо Жаҳон банки ва бошқа халқаро ташкилотлар таснифи бўйича бизнинг мамлакат 2014 йилдан бошлаб қашшоқ давлатлар қаторидан чиқди ва ўртача даромадга эга ривожланаётган мамлакатлар сафига ўтди”, – деган эди.
Орадан икки йил ўтиб эса Қирғизистон яна қайта қашшоқ давлатлар сафидан ўрин олди. Американинг Global Finance иқтисодий журнали 2016 йилги бой ва қашшоқ мамлакатлар анъанавий рейтингини эълон қилди. Таҳлилчилар томонидан 189 давлат кўрсаткичлари инобатга олинган рўйхатда Қирғизистон 148-ўринни эгаллаган ва аввалги кўрсаткичга нисбатан 6 поғона пастга тушиб кетган. Қирғизистон Папуа-Янги Гвинея ва Жибути давлатлари ўртасидан жой олиб, дунёдаги энг қашшоқ давлатлар 50талиги сафига киритилган.
Журнал рейтингни тузишда Жаҳон банки ва Халқаро валюта фондининг очиқ маълумотларидан фойдаланган. Рейтинг асосига аҳоли жон бошига тўғри келадиган ЯИМ (ялпи ички маҳсулот)нинг харид қобилияти тенглиги бўйича қайта ҳиссобланган натижаси олинган.
Рейтингга кўра, МДҲ мамлакатлари орасида энг юқори натижа Россияга тегишли бўлиб, у аҳоли жон бошига 26,109 долларлик кўрсаткич билан 52-ўринда. Марказий Осиё мамлакатлари орасида энг бадавлат деб топилган (54-ўрин) Қозоғистоннинг ҳар бир фуқаросига бир йилда 25,670 доллар тўғри келади. Туркманистон 17,4 минг доллар билан 73, Қирғизистон 3467 доллар билан 148, Тожикистон 2982 доллар билан 157-ўринда жойлашган.
Туркистон:
Ҳа, Атамбаев юзини Россия томонга бурмоқда. Энди унга қарши Ғарб томонидан матбуот ҳужумлари бошланади. Халқаро сиёсатда заиф давлатларга қарши ҳамиша ифлос ва ғирром услублар билан кураш олиб борилади. Капиталистик система бутун ер юзидаги мамлакатларни бир нечта давлатлар манфаати учун хизмат қиладиган глобал (марказлаштирилган) тизимни пайдо қилди. Атамбаев сингари заиф давлатнинг заиф етакчилари, оламий етакчи давлатнинг манфаатларидан юз ўгиришса, уларга қарши сиёсий, иқтисодий босимлар билан бирга, матбуот уруши ҳам эълон қилинади. Токи давлат етакчилари билан фуқоролари ўрталаридаги жарлик кенгайиб бораверсин. Юқоридаги статистик маълумот орқали ҳам сиёсий кураш уюштиришмоқчи. Манқуртлаштирилган заиф давлат сиёсатчилари эса, бу халқаро сиёсатнинг ифлос бошқарув системасига ёпишиб олишган!
