Туркия: Асадни куч билан ҳокимиятдан тушириш ниятимиз йўқ
Туркия президенти Ражаб Тоййиб Эрдуғоннинг бош маслаҳатчиси Илнур Чевик Туркиянинг Сурия режими билан зиддиятга кириш ва Сурия президенти Башар Асадни куч билан ҳокимиятдан тушириш нияти йўқлиги ҳақида маълум қилди. Бу ҳақида Спутник ахборот агентлиги хабар тарқатди.
Агентлик тарқатган хабарга кўра, Россиянинг РТ телевиденияси журналистининг саволларига жавоб берган Чевик “Анкара Дамашқ билан ҳамкорлик қилмайди. Шунингдек Асадни куч ишлатиш орқали қулатиш йўлига ҳам кирмайди”, дея маълум қилди.
Шунинг учун ҳам Остонада ташкил қилинган тинчлик музокаралари Туркия, Россия ва Эрон тарафидан бошқарилганлигини тилга олиб ўтган Чевик Асадга қарши куч ишлатиш асло кун тартибига киритилмаганлигини яна бир бор таъкидлади.
Чевик ҳозирда Туркия ҳарбийларининг Суриядаги ҳарбий амалиётлари ҳақида тўхталар экан, “Туркия Сурия тупроқларида ўз назоратини ўрнатмоқчи эмас. Унинг мақсади ИШИДни йўқ қилишдир. Биз ИШИД устидан ғалаба қозонганимиздан сўнг у ерни тарк этамиз”, деди.
Эслатиб ўтиш жоизки, бундан бир муддат аввал Турк армияси Сурияга Асадни қулатиш учун кирганлигини даъво қилган президент Эрдуғон саккиз соатдан кейин бу даъвосидан қайтган эди.
