Песков: Америка бўлмаса Сурияда жанг қила олмаймиз
Кремл матбуот котиби Дмитрий Песков Сурияда терроризмга қарши самарали шаклда кураш олиб бориш учун АҚШ билан ҳамкорлик қилиш лозимлигини билдирди. Песковга кўра, Россия АҚШ билан ҳамкорлик қилмаса, Сурияда асло муваффақиятга эришиши мумкин эмас.
“Биз ҳамкорликка тайёрмиз. АҚШ билан ҳамкорлик қилмай туриб, Сурияда терроризмга қарши самарали кураш олиб боролмаслигимиз мумкин. Бироқ бу борада муаммо америкалик ҳамкорларимизга бориб тақалмоқда”, деди Москвада матбуот вакилларига баёнот берган Песков.
Песков журналистларнинг “Сурияда Россия ва АҚШ ҳамкорлиги қайта тикланадими”, деган саволига “бу саволни америкалик ҳамкорларимизга бериш керак”, деб жавоб берди.
Бошқа томондан Россия парламенти юқори палатаси федерацион кенгашининг халқаро ишлар қўмитаси раиси Константин Косачев Сурияда қачон қонун устиворлиги таъминланса, ўшанда Россия Сурияни тарк этишини билдирди.
“Биз Суриянинг ички ишларига асло аралашмаймиз. Сурияда қонун ва қоидалар устиворлиги таъминлангандан кейингина Россия у ердан чиқади” деди Косачев.
Аввалроқ Россия ва Америка ўртасидаги Сурияга доир музокараларнинг тўхтатилганлиги эълон қилинган эди. Бу ҳақида АҚШ Ташқи ишлар вазирлигининг нотиғи Жон Кирби томонидан берилган ёзма баёнот орқали маълум қилинган эди. Кирбининг баёнотида айтилишича, Россия Сурияда амалга ошириш учун берган ваъдаларини бажаришда муваффақиятсизликка учраган.
Россия Сурияда ҳарбий қирғинларини бошлаганига бир йилдан ошди. Инсон ҳақлари ташкилотларининг маълум қилишича, Россиянинг ҳаво ҳужумларилари оқибатида минглаб тинч аҳоли вакилларининг ёстиғи қуриган.
