Россиядан Қирғизистонга “юк-200” келиши давом этмоқда
Ижтимоий масалалар, таълим, маданият ва соғлиқни сақлаш ва Халқаро ишлар, мудофаа ва хавфсизлик бўйича парламент қўмиталарининг қўшма мажлисида иштирок этган Ташқи ишлар вазири ўринбосари Азамат Усеновнинг маълум қилишича, жорий йилнинг ўтган етти ойи мобайнида Россиядан Қирғизистонга 430та “юк-200” олиб келинган.
ҚСДП фракцияси депутати Жанар Акаевнинг сўзларига кўра, Россия қирғизистонликлар пул топиш учун борадиган асосий давлат ва ҳар йили ватанига 350 киши темир тобутларда қайтади.
Шу сабабли Жанар Акаев ТИВга меҳнат муҳожирларини нафақат Россияга, балки Европанинг бошқа давлатларига ҳам жўнатишда ёрдам беришни таклиф қилди.
“Балки, ирқий ва диний қарашларига эътибор бермайдиган, ҳуқуқни муҳофаза қилиш органлари вакиллари фуқароларни таламайдиган мамлакатлар ҳақида ўйлаб кўришимиз керакдир? Ҳукумат фақат Россияда эмас, бошқа давлатларда ҳам иш ўринларини ташкил этиш масаласини кўриб чиқиши зарур”, – деди Акаев.