Путин Самарқандга келди
Россия президенти Владимир Путин 6 сентябр куни Ўзбекистон президенти Ислом Каримов хотирасига ҳурмат бажо келтириш учун Самарқандда бўлди. У ташриф давомида Ўзбекистон бош вазири Шавкат Мирзиёев билан учрашди.
У маълум қилдики, ўзбек халқи ва республика раҳбарияти Россиянинг энг ишончли дўст сифатида ҳисоблаши мумкин.
Путин Россия “Ислом Каримов томонидан бошланган ишлар давом эттирилиши” тарафдори эканини қайд этиб ўтди.
“Биз ўз томонимиздан ушбу ҳамкорликдаги ишлар ривожланиш йўли янада равнақ топиши учун қўлдан келганча ҳаракат қиламиз. Ўзбек халқини, Ўзбекистон раҳбариятини қўллаб-қувватлаймиз. Бу борада бизга энг ишончли дўстга ишонгандек ишонишингиз мумкин”,- деди Путин.
Путин Ўзбекистон ва Россия муносабатлари стратегик шериклик асосида қурилганини таъкидлаган.
“Биз ҳамиша бу муносабатларни қадрлаганмиз”,- деган Путин.
Туркистон:
Каримов ўлимидан сўнг вужудга келган сиёсий бўшлиқни тўлдириш учун бўлган ҳаракат кундан-кунга авж олиб бормоқда. Россия Каримов томонидан вужудга келтирилган режимни сақлаб қолиш ва ҳокмият тепасига келадиган янги раҳбарни ўз измига бўйинсундиришга бўлган ҳаракатларини аллақачон бошлаб юборди.
Россия Ўзбекистонда Каримов режимини сақланиб қолиши ва керак бўлса янада қаттиққўллик билан бошқарилиши тарафдори эканлиги аниқ. Шу сабабли ҳам Россия янги вужудга келадиган ўзбек ҳукумати билан имкон қадар яқинлашишга ҳаракат қилмоқда. Каримов ўлими ортидан Россия ҳукумати Путинга Ўзбекистон билан ҳарбий-техник ҳамкорлик ҳақидаги шартномани имзолашни таклифини илгари сурди.
Путиннинг бугун Самарқандга қилган сафари Каримов “хурматини божо келтириш” билан бирга унинг янги ворисини ким бўлишига бўлган ишора ва Каримов режимини давом эттирилишига берилган “оқ фотиҳа” ўрнида қабул қилиш мумкин. Ўзбекистон конституциясига мувофиқ Ўзбекистонни вақтинчали сенат раиси Ниғматулла Йўлдошев бошқариши белгилаб қўйилган бўлишига қарамай, Путинни бош вазир Шавкат Мирзиёев кутиб олиши ва Каримов қабри тепасида мулоқот қилиши кейинги президент ким бўлиши мумкинлиги тўғрисидаги саволларга жавоб бўлиши мумкин.