Гардиан: БМТдан Асад режимига молиявий ёрдам
Сурияда 2011-йилда бошланган қўзғолон ортидан юз минглаб одамларнинг ёстиғини қуритган ва миллионлаб сурияликларнинг мамлакатни тарк этиб, саргардон бўлишига сабаб бўлган ва айни пайтда халқаро санкцияларга тобе бўлган Асад режими БМТдан молиявий ёрдам олганлиги айтилмоқда. Бу ҳақида Британияда чиқадиган Гардиан газетаси хабар тарқатди. Британия матбуотида тарқатилган хабарларга кўра, БМТга оид ёрдам фондлари бир неча йиллардан буён Асад оиласига тегишли бир қанча вақфларга миллионлаган доллар ёрдам кўрсатиб келган.
“Бирлашган Миллатлар Ташкилоти ёрдам дастури доирасида Башар Асадга яқин кимсаларга миллионлаб долларга тенг ресурсларни ўтказиб берди”, дея ёзади Гардиан газетаси.
Гардианнинг текширувларига кўра, АҚШнинг ҳам, Европа иттифоқининг ҳам санкциялар рўйхатида бўлган компаниялар ва ишбилармонлар Бирлашган Миллатлар ташкилотидан катта миқдорда маблағ қабул қилган.
“БМТ тарафидан маблағ ётқизилган вақфлардан бирининг асосчиси Асаднинг хотини Асмо Асаддир, яна бири эса Асаднинг яқин дўсти Рами Маклуфдир. БМТ чиқарган баёнотда айтилишича, ёрдам дастурига оид маблағлар фақат Асад режими маъқул кўрган компанияларга тақдим этилиши мумкин. Шунингдек, БМТ баёнотида ёрдам пуллари ҳақиқатан мақсадга мувофиқ равишда сарфланиши учун БМТ қўлидан келган ишни қилганлиги таъкидланади”, “Аммо БМТни танқид остига олаётганлар, ёрдам пуллари фақат Асад тарафдорларининг фойдасига ишлатилганлигини таъкидлашмоқда. Уларга кўра, юз минглаган кишиларнинг ўлимига сабаб бўлган Сурия урушининг асосчиси Башар Асад БМТ ёрдами билан ўз курсисиини сақлаб қолишга ҳаракат қилган”, дея қўшимча қилади газета.
Айни пайтда Сурия миллий коалицияси Асад режими билан алоқа ўрнатган ва унга молиявий ёрдам кўрсатган БМТ расмийлари устидан тергов ўтказишни талаб қилмоқда.
“Газетада чиққан хабарлар БМТ расмийларининг Асад режими билан қурган алоқаларга нисбатан муз тоғининг фақатгина кўринган қисмини намоён қилмоқда (яъни бунинг кўринмаган тарафлари ҳам бор)”, дейилади Сурия миллий коалицияси тарафидан чиқарилган ёзма баёнотда.
Сурия миллий коалицияси аввал ҳам БМТ расмийлари тарафидан Асад режими ва унга тобе ҳарбий қароргоҳларга молиявий ёрдам кўрсатилганлиги даъво қилиб, бу борада суриштириш олиб борилишини талаб қилган эди. Бироқ ҳанузгача БМТ унинг талабини қондирган эмас.
