Россия президенти Владимир Путин ўзининг иқтисодий маслаҳатчиси Алексей Кудриннинг айрим жиҳатларда Ғарбга бўйсуниш зарурлиги ҳақида берган маслаҳатини қатъиян рад қилди. Бу ҳақида “Ведомости” газетаси хабар тарқатди. Газетага кўра, Путин сўнгги нафасигача Россия суверинитетини ҳимоя қилишга ваъда берган.
“Иқтисодий ривожланишни қўллаб-қувватлаш учун айрим жиҳатларда Ғарб талабларига бўйсуниш зарур деб ҳисоблаган собиқ молия вазири Кудрин геосиёсий кескинлик даражасини енгиллаштириш ҳақида президентга маслаҳат берди. Кудриннинг ҳисоблашича, геосиёсий амбицияларнинг баъзиларидан воз кечиш технологик ва иқтисодий соҳаларда Ғарб билан Россиянинг ўртасини ажратиб қўйган бўшлиқни камайтириш имконини беради. Лекин Путин собиқ молия вазирининг таклифини рад қилди. Путиннинг таъкидлашича, Россия ўз суверенитети борасида Ғарб билан савдолашиши мумкин эмас. Гарчи Россия иқтисодий ва технологик жиҳатдан ривожланган давлатлар сафида юриш учун саъй-ҳаракатлар олиб бораётган бўлса ҳам, Ғарбга тобе бўлмаслиги билдирган Путин сўнгги нафасига қадар Россия суверинитетини ҳимоя қилишга ваъда берди”, дея ёзади газета.
Газетанинг ёзишича, президент Путин билан собиқ молия вазири ва ҳозирда иқтисодий маслаҳатчи Кудрин ўртасидаги мунозаралар президентга қарашли иқтисодий ишлар кенгаши йиғилишида бўлиб ўтган.
Ўз навбатида Россия Президентининг матбуот вакили Дмитрий Песков “Ведомости” газетасида чиққан мақолани тасдиқлаш ёки рад қилишдан ўзини олиб қочди. Кенгаш йиғилишидаги мунозаралар ёпиқ эшиклар ортида бўлиб ўтганлигини қайд этган Песков халқаро майдонда конструктив позиция олиш учун Путинга маслаҳат беришнинг ҳожати йўқлигини қўшимча қилди.
“Президент бундай маслаҳатсиз ҳам ихтилофларни ҳал қилиш, ҳамкорликни чуқурлаштириш ва хавфсизликни мустаҳкамлашга қаратилган изчил сиёсатни амалда бажариб келмоқда. Буни била туриб, халқаро ишларда конструктив позиция тутиш зарурлиги ҳақида президентга маслаҳат беришнинг кераги йўқ”, деди Песков.
